Шымкент қаласы мәслихатының кезекті елу алтыншы сессиясы өтті

Қалалық әкімдіктің үлкен мәжіліс залында алтыншы шақырылған Шымкент қаласы мәслихатының кезекті елу алтыншы сессиясы өтті. Күн тәртібіндегі мәселелер мен көкейкесті сауалдарды ортаға салу үшін қала әкімі, мәслихат депутаттары мен білім және денсаулық, бюджеттік мекемелер және бөлім басшылары, БАҚ өкілдері қатысып, өзекті мәселелерді ортаға салды. Алдымен, тұрақты комиссия мен редакциялық комиссия мүшелерінің қатысуымен өткен отырыста мәселелер егжей-тегжей қаралды. Шымкент қалалық мәслихатының хатшысы Ғани Ташқараев төрағалық етіп, жүргізіп отырды. Алдымен, Шымкент қаласының ішкі саясат және дін істері басқармасының басшысы Жанар Бектаеваның есебі тыңдалды. Айтылған бірқатар ұсыныстар депутаттар жағынан қолдау тауып, бекітілді.

Шымкент қаласының жұмыспен қамту және әлеуметтік қорғау басқармасының басшысы Ғалымжан Балтабаевтың есебі талқыланды. Нәтижелі жұмыспен қамту қайта қаралып, халықтың әлеуетін көтеру мәселесі қозғалды. Бүгінгі сессияда Шымкент қаласының денсаулық сақтау басқармасының басшысы Асхан Байдувалиевке бірқатар сауалдар қойылып, өзектілері ортаға салынды. Қаланың шет- аймағында орналасқан шағын аудандардағы ауруханалардың жағдайы, мекемеге қарайтын тұрғындардың ем шараларын толық жүргізуге мүмкіндік болатындай жағдай жасау жайында ұсыныс айтылды.

Келесі мәселе — табиғи ресурстарды дұрыс пайдалану болса, қаламыздағы табиғи ресурстар және табиғат пайдалануды реттеу басқармасының басшысы Ахмет Татыбаев бірқатар ойымен бөлісті. Баяндамашыға қаламыздың тұрғындар көп жиналатын саябақтың бірі — «Дендрологиялық саябақ» жайында сауалдар жолданды. Кіру ақысының нақтылануы жайындағы мәселеге Ахмет Өтегенұлы тұрақты бағасының — 25 теңге екенін, тұрғындарға тиімді болуы үшін нарықтағы бағасын 3 жыл бойы ұстап тұрғанын жеткізді.

Энергетика және коммуналдық шаруашылық басқармасының басшысы Нұрлан Жаманкөздің есебіне кезек келді. Шағын, көзге көп түсе бермейтін көшелердегі тұрғын үйлерге жарық, ауыз судың жетпей жатқаны жауыр болған мәселе екенін халық қалаулылары айтты. Жұмыс жүргізіліп жатқандығы айтылып, бұл мәселенің де ортақ шешімі табылып мақұлданды. Дегенмен де, сессияға қатысушылар келешекте нәтиже көргісі келетінін жеткізді.

Сөз кезегі Шымкент қаласының кәсіпкерлік және индустриялдық-инновациялық даму басқармасына келді. Береке Дүйсебековке нарықтағы бағалардың тұрақсыздығы туралы уәж айтылды. Әрмен қарай, Шымкент қаласының отбасы, балалар және жастар істері жөніндегі басқармасының есебі тыңдалды. Тұрақты комиссия мүшелері жастар арасында сайланған жастар мәслихат депутаттарының міндеттері мен атқаратын жұмыстары жөнінде жазбаша мағлұмат берілуін тапсырды.
Осылайша күн тәртібіндегі өзекті он алты проблема талқыға түсті. Фракцияның жеке талқылауынан соң, қала әкімі Ерлан Айтахановтың назарына күн тәртібіндегі он алты мәселенің шешім жобасы ұсынылды. Қарсы, қалыс қалмай , дауысқа салынды.
Кезекті сессия өзекті мәселелерді назарға алып, бөлім басшыларына бірқатар сын- ескертулермен аяқталды.

Айғақ-ақпарат