«Шетелдегі қандастарымызды Атамекенге қайтару ісі ешқашан назардан тыс қалмақ емес және қалмайды да. Әлемнің түкпір-түкпіріндегі қандастарымыздың басын туған жерде біріктіру біздің парызымыз». Бұл ел Президенті Қасым-Жомарт Кемелұлының сөзі.
Қазіргі күні 5 миллионға жуық қазақтар шетелдерде өмір сүруде. Заманның қиын-қыстау кезеңінде бас сауғалаған халық өзге елдің қамқорлығына бөленгенімен де, бар арманы туған жеріне оралу.
«Айғақ» арнасы дәл осындай қандастарымызды елге шақыру мақсатында Тәжікстан еліне арнайы сапар жасаған болатын. Солардың бірі Тәжікстан Республикасы Дусти ауданы, Гараути елді мекеніндегі Нұрматовтар отбасы. Бұл үлкен әулеттің бір тобы қазіргі таңда Қазақстанға көшіп үлгерген.
Жамбыл облысы баяғы Амангелді, қазіргі Көкбастау ауылына қоныстанған қандастарымыз туған жерінде өздерін бақытты сезінеді. Бұл шағын ғана ауылға Тәжікстан елінен 20-дан астам отбасы көшіп келген. Осы қоныс аударушылардың елдегі жағдайын, тыныс-тіршілігін білу мақсатында «Айғақ» арнасы Жамбыл облысына арнайы іздеп барды. Қазіргі таңда шаңырақ иелері мемлекеттен көмек күтпей, баспана салып, шаруамен айналысуда. Үйінің алдындағы шағын жерге көкөністер мен түрлі жеміс ағаштарын егіп, отбасын асырауда.
Ендігі мақсаттары — Тәжікстанда қалған басқа да бауырларды туған жерге көшіру. Ол үшін жаңа үй салып, тұрмыстық жағдайларын жақсартуда. Қазіргі таңда Гараути елді мекенінде Қазақстанға қайтуды көздеп отырған 40-қа жуық отбасы бар.
Иә, заманның қиынында қол ұшын созған Тәжікстан еліне айтар алғыстары көп. Ол жақтағы көмек берген көршілерін қимаса да, жүректері Отанға әрдайым тартып тұрады. Жамбыл облысының халқы да қандастарды құшақ жая қарсы алып, бар ілтипатын көрсеткен. Әрине, елін сағынып келген ағайын үшін бұл үлкен қолдау.
