Ляньюньган — Қытай елінің портты қаласы. Сары теңіз жағалауында орналасқан әсем шаһар.
4 688 100 тұрғыны бар Ляньюньган қытайлықтар үшін кішкентай қала іспеттес. Дегенмен, мұнда қайнаған қызу жұмыстың куәсі боласыз.
Шымкент жастары Қытай Халық Республикасына сапардың екінші күнінде Ляньюньган қаласындағы порттармен де танысты. Соның бірі — «Қазақстан – Қытай халықаралық логистикалық компаниясы».
Бұл базада бүгінде 118 адам жұмыс істесе, оның 4-еуі біздің қандастарымыз. Қос елдің кәсіпкерлері бірге бұл салада 2014 жылдан бері жұмыс жасайды.
Халықаралық терминалдың ашылу салтанатына ҚР Тұңғыш Президенті-Елбасы Нұрсұлтан Назарбаев қатысқан.
Ұлы Жібек жолының маңызды бөлігі саналатын халықаралық Транскаспий дәлізін дамытуға Қазақстан, Қытай, Грузия, Әзірбайжан және Түркия елдері мүдделі. Жүктерді Еуропа мен Қара теңізге осы бағыт арқылы жөнелтудің тиімділігі көп екен.
Ерекше атап өтетін жайт, бұл орталықтан Ляньюньган – Алматы бағытында тұрақты контейнер пойызы іске қосылған. Бүгінде Қазақстан мен Қытай арасындағы логистикалық салада тығыз әріптестік орнаған. Бұл екі ел арасындағы сауда-экономикалық ынтымақтастықты нығайта түсері сөзсіз.
«Бір белдеу, бір жол» жобасы аясында мемлекетіміз – Еуропа мен Азия арасындағы негізгі транзиттік елге айналған. Қазір Қытаймен шекарада кедергісіз сауда жасау үшін «Қорғас – Шығыс қақпасы» арнайы экономикалық аймағын құру жұмысы толық аяқталған.
