Шымкент қаласы Полиция департаментінің қызметкерлерімен 2019 жылғы 14-15 маусым күндері сағат 9-00-ден 19-00-ге дейін уақыт аралығында республика көлемінде «Жолда қабылдау» акциясы өткізіледі, деп хабарлайды Шымкент қаласы ПД Баспасөз қызметі.
Іс-шараның негізгі мақсаты – азаматтардың құқықтық сауатын және олардың жол қауіпсіздігі ережелерін сақтаудағы жауапкершілігін арттыру, тұрғындарға құқықтық көмек көрсету. Қоғам мен билік арасындағы байланыс алаңын кеңейту. Азаматтардың жеке түсініктері мен жауапкершіліктерін сезіндіру, жол апаты келеңсіздіктерін алдын алып, жол қауіпсіздігін қамтамасыз ету болып табылады.
Акция Шымкент қаласы А.Байтұрсынов көшесі бойында орналасқан Диагностикалық орталығының алдында және Шымкент қаласы 11 мөлтек ауданы «Мечта» сауда үйінің алдында өтеді. Сондай-ақ, Шымкент қаласы Асар мөлтек ауданындағы №2, 4, 6, 8, 10, 12 үйлердің ауласы мен Шымкент қаласы Б. Момышұлы көшесі бойынша орналасқан №8, 8А, 8Б үйлердің ауласында болады.
Қабылдауда Әкімшілік полиция басқармасының Әкімшілік практика, Көші-қон қызметі, Жол-техникалық инспекциясы, Азаматтық және қызметтік қару айналымын бақылау және Криминалдық полиция басқармасының қызметкерлері қатысып, жүргізушілер мен жолаушылардың сауалдары мен өтініштеріне кәсіби жауаптар беретін болады. Сонымен қатар, 8-72-52-30-10-30 телефоны бойынша «колл-центр» жұмыс жасайды.
