Нұр-Сұлтан қаласындағы «Тәуелсіздік» сарайында өтіп жатқан Қазақстан Республикасының Президентін Ұлықтау рәсіміне еліміздің барлық өңірлерінен делегаттар қатысуда.
Мемлекет басшысын ұлықтау – Қазақстан Республикасы Президентінің лауазымын атқаруға кірісуіне арналған ресми рәсім екендігін айта кетейік.
Салтанатты рәсім кезінде Қасым-Жомарт Тоқаев оң қолын Қазақстан Республикасы Конституциясының үстіне қойып, халық алдында ант береді. Осыдан соң Орталық сайлау комиссиясының төрағасы Мемлекет басшысына Қазақстан Республикасы Президентінің куәлігін тапсырды.
«Бұл жеңіс — халқымыздың жеңісі. Халқымыздың бірлігі, ынтымағы маңызды. Ашық және әділ жұмыс істеймін. Біздің бір ғана Отанымыз бар. Қазіргі дамыған Қазақстан — ең алдымен Елбасымыздың арқасы» — дейді Қазақстан Республикасының Президенті лауазымына кіріскен Қасым-Жомарт Тоқаев. Мұнан өзге халқымыздың бірлігі мен ынтымағын сақтау басты міндетім деген Президент Елбасының салған сара жолымен елдің дамуындағы басты міндеттерді негізге алатындығын жеткізді.
Халықтың әлеуметтік жағдайына баса назар аудару — негізгі мақсаттардың бірі. Сондай-ақ, елімізде бірыңғай жаңа экологиялық кодекс қабылдау қажеттігін Қазақстан Республикасының Президенті Қасым-Жомарт Тоқаев тілге тиек етті.
