«Ауыл шаруашылығы саласында алдыңғы қатарлы технологияларды қолдана отырып халықты жұмыспен қамту мақсатында жүзеге асырылатын жобалар». Нақ осы тақырып аясында Түркістан қаласында республикалық семинар-кеңес өтуде.
Ауыл шаруашылығы саласының ғалымдары мен аудан қала əкімдері шаруашылық төрағаларының қатысқан семинар алдымен Есім хан алаңында ұйымдастырылған көрмеден бастау алды.
Мұнда агроөнеркәсіп кешеніндегі озық технологиялармен қатар тұқым, минералды тыңайтқыштар, гербицид, пестицид, тамшылатып-жаңбырлатып суғару, жылыжай жабдықтары, асыл тұқымды төрт түліктер, балық өсіру және құс өсіру жабдықтары, сүт, құрама жем өндіру жабдықтары, ветеринариялық препараттар), сондай-ақ заманауи техникалар қойылған.
Аграрлық саладағы жетістіктерді айқындайтын ауыл шаруашылығы көрмесін Түркістан облысының əкімі Өмірзақ Шөкеев аралап көріп тың жүйелер бойынша жұмыс жасап жатқан шаруалармен тілдесті. Ал мұнан соң республикалық семинар-кеңес отырысы əрмен қарай жергілікті мəдениет үйі ғимаратында өз жалғасын тапты.
Мұнда сөз алған аймақ басшысы Өмірзақ Естайұлы ауыл шаруашылығы саласының өнімділігін 2,5 есеге дейін ұлғайту бағытында жаңа технологияларды қолданудың маңыздылығын атап өтті. Осы орайда бірқатар шаруашылықтардың белсенді жұмысын үлгі еткен облыс əкімі ескі жүйеден арылып жаңа технологияларды қолдану қажеттігі бойынша тиісті тапсырмалар жүктеді.
