Үкімет басшысы Ақтөбе облысының активіне жаңа әкімді таныстырды

Асқар Мамин мәслихат депутаттарына Мемлекет басшысының Оңдасын Оразалинның кандидатурасын Ақтөбе облысының әкімі лауазымына ұсыну туралы хатын оқып берді. Депутаттар ҚР Президенті ұсынған кандидатураны бірауыздан қолдады.

Оңдасын Сейілұлы Оразалин 1963 жылы дүниеге келген. Ақтөбе педагогикалық институтын, С.М.Киров атындағы Қазақ мемлекеттік университетін тәмамдаған. Мемлекеттік қызметте әртүрлі лауазымдарды атқарған, коммерциялық секторда жұмыс істеген. Атап айтсақ, Ақтөбе облысының Мұғалжар ауданының әкімі, Ақтөбе облысы әкімінің орынбасары. 2017 жылғы наурыздан бастап ҚР Президентінің Әкімшілігі басшысының орынбасары болып еңбек еткен.

Асқар Мамин кезектен тыс сессия қорытындысы бойынша Ақтөбе облысының активімен кездесу өткізді. Премьер-Министр Бердібек Сапарбаевқа өңірдің дамуына қосқан үлесі үшін алғыс білдірді. Жұмыстың 4 жылында облыстың әлеуметтік-экономикалық дамуында елеулі нәтижелерге қол жеткізілді: жаңа индустриялық жобалар іске асырылды, әлеуметтік салаға үлкен серпін берілді. Асқар Мамин Бердібек Сапарбаевқа жаңа қызметінде табыс тілеп, Елбасының көрсеткен жоғары сенімін абыроймен ақтайтынына сенім білдірді. Еске сала кетейік, ҚР Президенті Н. Назарбаевтың Жарлығымен Бердібек Сапарбаев Ақтөбе облысының әкімі қызметінен босатылып, ҚР еңбек және халықты әлеуметтік қорғау министрі болып тағайындалды.

Премьер-Министр жаңа әкімді таныстыру барысында Оңдасын Оразалиннің түрлі жауапты басшылық лауазымдарда, соның ішінде Ақтөбе облысы әкімінің орынбасары қызметінде үлкен жұмыс тәжірибесі бар екенін атап өтті. Соңғы жылдары ҚР Президентінің Әкімшілігі басшысының орынбасары болып қызмет еткен. Ол өңірлік жұмыстың, сондай-ақ әлеуметтік жаңғыру саласының қыр-сырын меңгерген. Асқар Мамин жаңа әкімге сәттілік тілеп, Оңдасын Оразалин облыс активімен бірлесіп, Елбасы алға қойған міндеттердің сапалы орындалуын қамтамасыз ететініне сенім білдірді.

Рrimeminister.kz.