«Оңтүстіктен Солтүстікке қоныс аудару» бағдарламасы әлі жалғасуда. Жыл өткен сайын мұны қоштайтындар көбейіп келеді екен. Бағдарламаға қатысатындар біріншіден мемлекеттен көмек қаражатын алады, жұмыспен қамтылып, шаруашылықпен айналысамын деушілерге де мархабат. Ең бастысы халқы күн сайын кеміп жатқан Солтүстік, Қостанай, Павлодар, Шығыс Қазақстан облыстарының ауыл-аймақтарын сақтап қалуға үлес қосасыз. Елбасының ұсынған бұл бағдарламасын насихаттау мақсатында миллионды мегаполиске Павлодар және Солтүстік өңірлерінен өкілдер келді. Осыған байланысты, Әл Фараби ауданының әкімдік ғимаратындағы мәжіліс залында жиын өтеді деп хабарланған. Алайда, жауаптылар ұйымдастыру жұмысын дұрыстап қолға алмағаны байқалды. Көшуге ниетті тұрғындарға хабарламаның өзі жетпеген сыңайлы.
Президенттің тапсырмасын іске асыру үшін насихатты жүргізуге келген топ тек санаулы тұрғындармен жүздесіп, мүмкіндікті айтты. Мәселен, Павлодарда Баянауыл деген аудан бар. 22 мың тұрғыны бар аймаққа қоныс аударуға қызықсаңыз ондағы жалақы 70 мыңнан 120 мыңға дейін. Аудан бойынша 126 баспана бос тұр. Құны 1 миллионнан 5 миллионға дейін бағаланған. Жылына 200 мыңға жуық турист келетін Баянауыл ауданында мұғалімдер, дәрігерлер мен түрлі техникалық қызметкерлер жетіспейтін көрінеді. Бұл туралы Баянауыл ауданы әкімінің орынбасары Сейітжан Жұмашев хабарлады. 30 жастағы Шымкенттің тумасы мемлекеттік қызметтегі тәжірибені Керекуде жинауды жөн санаған. Аңыздар мекенінде қызметтің сатысынан өтіп жүрген әкімнің орынбасары жерлестерін шақыра келіпті.