Өңірлердің өсуі: Әулиеата жұрты әкімнің есебін тыңдауға жиналды

Түркістан облысының аумағынан 160 шақырым қашықтықта жатқан Жамбылдың жариялы жұмысын біздің арна да назардан тыс қалдырған емес. «Батыс Қытай — Батыс Еуропа» күре жолы қатынасты нығайта түсті десек қателеспейміз. Батыс пен Шығысты жалғаған магистраль облысаралық барыс-келісті де жақсартты.  «Ұлы Жібек жолын» бес ғасыр өткен соң қайта жаңғыртуды ұсынған еліміздің Президенті Нұрсұлтан Назарбаевтың бастамасы — дәл осы транзиттік дәліз арқылы әлем жұртшылығының назарын аударды. Міне, бүгінде пайдалануға берілген күре жол «Өңірлердің өсуі» арқылы жамбылдық жұрттың жағдайын елге жеткізбек болған біздерді де айналасы 2 сағаттың шамасында  облыстың орталығына алып келді.

Қазақстан Республикасы Президентінің «Орталық атқарушы органдар басшыларының, әкімдердің, ұлттық жоғары оқу орындары ректорларының халыққа есеп беру кездесулерін өткізу туралы» 2016 жылғы 5 ақпандағы № 190 Жарлығына сәйкес 2019 жылдың 22 ақпанына сағат 11.00-ге белгіленген, «Баласағұн» орталық концерт залында өтетін Жамбыл облысының әкімі Асқар Исабекұлы МЫРЗАХМЕТОВТІҢ халық алдындағы есеп беру кездесуіне келген жұрттың қатары қалың. 2018 жылы өңірде атқарылған әлеуметтік-экономикалық дамудың негізгі көрсеткіші жарияланады бүгін. Тиісінше, 2019 жылға әкімдіктің алдында белгіленіп отырған жоспарлар бар.Жалпы, Жамбыл облысы әкімдігінің сайтында жарияланған мәліметтерге сүйенсек, 2018 жылы өңірдің өнеркәсіп кәсіпорындарымен 396,2 млрд. теңгеге өнім өндіріліп, нақты көлем индексі 102,6%-ды құраған.

2018 жылы облыстың жергілікті атқарушы органдарының жұмысы Елбасының «Төртінші өнеркәсіптік революция жағдайындағы дамудың жаңа мүмкіндіктері», «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауларындағы және «Президенттің бес әлеуметтік бастамасы» атты халыққа үндеуінде көрсетілген міндеттер мен басымдықтарды жүзеге асыруға бағытталып отыр.

Жамбыл облысының әкімі қызметіне Елбасының Жарлығымен 2018 жылдың 10 қаңтарында келген Асқар Мырзахметов небәрі 1 жылдың айналасында Әулиеата жұртының ыстық ықыласына бөленгендігін байқадық. Өйткені, жарқын жүзді жамбылдық ағайынның алдын ала айтары да алғыспен астасып, атқарылған тірліктерден хабардар екендігін танытып жатты. Өлкедегі өзекті мәселелердің шешу ісін де алдағы уақыттың еншісіне қойғандығын ерекше айтып берді.

Атап өтейік, Жамбыл облысының халқы бүгінгі таңда 1 123 687 мың адамды құрайды.

«Айғақ-ақпарат»