Туған жерге тағзым!

Дүниежүзі қазақтарының қауымдастығы және «Отандастар» қоры қандастарымызбен дөңгелек үстелде жиналды. Айтулы жиын Қожа Ахмет Ясауи атындағы Халықаралық қазақ-түрік университетінде «Қасиетті Қазақстан: Туған жерге тағзым» тақырыбында өтті. Атажұртқа бүл күні арнайы келген делегаттар көкейдегі сұрақтарына жауап алды, ыстық ықыластарымен бөлісті.

Дүниежүзі қазақтарының қауымдастығы шетелдегі бауырларымызға барынша жағдай жасап келеді.  Тілім деп тебіренген,  дәстүрім деп дабыл қаққан қандастар ақтарыла сөз сөйледі. Осы күнге дейін 1 млн-ға жуық қандасымыз туған жерге оралған. Қазақстанда тұрып жатыр. Шет мемлекеттегі бүгінгі таңда қазақтардың саны 5 млн-ға жуық. Осы тұста «Туған жерге оралуды жоспарлаған азаматтар болса, қарсы алуды біз міндетті түрде ұйымдастырамыз» деді Дүниежүзі қазақтарының қауымдастығы төрағасының бірінші орынбасары Зауытбек Тұрысбеков.

Елбасының шетелдегі қазақтарды қолдау негізінде Дүниежүзі қазақтарының қауымдастығы жанынан «Отандастар» қоры құрылған болатын. Бүгінде  Нұртай Әбіқаев бастаған аталмыш қор көшіп келген және шетелдегі қандас бауырларымызға қол ұшын созып келеді. Бүгінгі шараның өтуіне де елеулі үлес қосқан.

 Туған жердің қадірін алысқа сапар шеккенде білесің. Ал бүгінгі жиынға жиналғандардың ішінде туған жерге алғаш келгендер де болды. Иран елінен келген қандасымыз «Елде ұйым құру, қауымдастық құруға еш мүмкіндік жоқ. Біздің тілегіміз біреу ғана — жас тұяқтарымыз дәстүрді, салтты, тілді ұмытпаса дейміз» —  деді. «Өзге елде сұлтан болғанша, өз еліңде ұлтан бол». Өзектерін өксік өртеген қандастарымыз туған жердің қадіріне әбден жеткен. Еліміздегі кейбір азаматтардың менсінбей, керек етпей  жүрген  ана тілі олардың көздің қарашығындай қорғап, атадан балаға мирас етіп қалдырып келе жатқан бар асылы болып отыр. Тілім деп, дәстүрім деп шырылдаған қандастарымыз қазақша кітаптар мен баспасөз материалдарына зәру. Ғаламтордағы мәліметтерге қол жеткізе алмайтындар бар болып шықты. Күніне 2 сағат уақыт қана электр жарығы берілетін ауылдарда тұратын бауырларымыз да бар көрінеді. Дүниежүзі қазақтарының қауымдастығы және «Отандастар қорынан» осы мәселе төңірегінде демеу сұрады. Түркістан облысының әкімі Жансейіт Түймебаев қандастарымызды жаңа құрылған, киелі облысқа көшіп келуге шақырды.

 Туған жердің топырағын басып, ауасын тыныстауға және қазақтың ғана емес бүкіл түркі жұртының киелі ордасына айналған Түркістанды көзбен көріп, зиярат етуді бұйыртқандары үшін ысытық ықыластарын айтты делегаттар. Ата-бабаның ізі жатқан мекенге келешекте балаларымен  келуді мақсат етіп отыр. Шетелдегі қазақтардың туған жерімен байланысын арттыруда «Дүниежүзі қазақтарының қауымдастығы» РҚБ-ның  Шымкент қаласы және Түркістан облысының филиал жетекшісі Дулат Әбіш барынша атсалысып келеді. «Айтылмаған сөз жетім». Дөңгелек үстелде маңызды мәселелердің барлығы қозғалды. Жауаптар берілді және лауазымды тұлғалардың күнделігіне түртілді. Келешекте қаралмақ. Елбасының жастарды қолдау саясаты естен шығарылған жоқ. Жиі кездесу жоспарланды.

Айтолқын Молдабекова