Түркістан облысында білім саласындағы жемқорлықты жоятын «Sitcen» жобасы жүзеге асырылуда. Бүгінде оның ықпалымен сыбайлас жемқорлықтың орын алуы 65%-ға төмендеген. Яғни, жұмысқа қабылдану, баланы мектепке тіркеу және балабақшаға кезекке қою қызметінің барлығы электронды түрде жүзеге асырылып жатыр. Қазіргі таңда jumys.sitcen.kz порталы арқылы 837 маман өзі қалаған жұмысқа орналасқан. «Цифрлы Қазақстан» мемлекеттік бағдарламасы аясында ұйымдастырылған бұл жобаны алғашқы болып Түркістан облысы іске асыруда.
«Цифрлы Қазақстан» мемлекеттік бағдарламасының білім саласында жүзеге асуы бүгінгі таңда мықтап қолға алынған. Ал, Түркістан облысы Республика деңгейінде бұл жүйені ең бірінші болып қолға алған өңір. Sitcen.kz порталы енді облысымыздағы барлық тұрғындарға тиімді. Себебі, үйде отырып-ақ балаңызды мектепке немесе балабақшаға смартфоныңыз арқылы тіркей аласыз.
Порталда balabaksha.sitcen.kz бөлімі бар, сол арқылы көрсетілген орындарды толтырып, балаңызды кезекке қоя аласыз. Көп уақытыңызды да алмайды, балаңыз балабақшаға қабылданған уақытта ұялы телефоныңызға барлық ақпарат көрсетілеген смс келеді. Бүгінгі таңда «мектепке дейінгі білім беру ұйымдарына жолдама беру және кезекке қоюды автоматтандыру» жобасына 481 МДББҰ қамтылған. Бұл көрсеткішті 100 пайызға жеткізу 2018 жылдың соңына дейін жоспарлануда. Мұнымен қоса, енді ата-аналар балаларын жетектеп, қолына құжаттарын ала жүгірмей, mektep.sitcen.kz порталы арқылы білім беру ұйымдарына қабылдана алады. Бүгінгі күні бұл жүйе арқылы 54751 оқушы электронды түрде 1-ші сыныпқа қабылданды. Естеріңізге сала кетейік, бұл жүйе 2018 жылдың шілде айынан бастап облыстағы барлық 902 мектепке енгізілген болатын.
Сонымен қатар, облыстағы барлық мектептерде jumys.sitcen.kz порталы арқылы қатардағы қызметкерлер мен педагогтарды жұмысқа қабылдаудың автоматтандырылған жүйесі енгізілген. Бұл өзгеріске ерекше назар аудармасақ болмас. Өйткені, Түркістан облысы білім саласындағы сыбайлас жемқорлықтың орын алу көрсеткішінде көш бастап тұрған болатын. Енді бұл салада алаңдатушылық тудырған мұндай кемшілікті jumys.sitcen.kz порталы алдын алуда. Неге десеңіз, жүйенің өзіндік талаптары мен ерекшеліктері бар. Біріншіден, порталға тіркеліп, сұралған құжаттардың барлығын электронды түрде жүктейсіз. Содан кейін тағы да электронды түрде тест тапсырасыз. Жақсы нәтижеге қол жеткізсеңіз, ұялы телефоныңызға смс келіп, сізді комиссия мүшелерімен кездесуге шақырады. Ерекше айта кететін жайт, комиссия мүшесі кім болатыны құпияланады. Комиссия мүшелері де алдына келетін маман жайлы, тіпті қай күні комиссия мүшесі болатынын да білмейді. Және бұл туралы ақпарат тек смс арқылы жүзеге асырылады. Ешқандай сала қызметкері емес, жүйенің өзі жұмыс атқарады. 
Түркістан облыстық білім басқармасының орынбасары Ардақ Мәдіханқызының айтуынша, облыста орын алған білім саласындағы сыбайлас жемқорлықтың жойылуына sitcen.jumys.кз порталы өз нәтижесін көрсетуде екен. Көрсеткіш 65 пайызға төмендеген. 
Бұдан өзге облыс бойынша «BilimLand»цифрлық білім беру ресурстарымен 100 пайыз мектептер қосылған 3511 акаунттық барлығы активация жасалған. Облыстық бюджеттен цифрлық білім беру ресурстарымен қамтамасыз ету мақсатында 1500 дана «Bilim Book» компьютер-планшет шалғай ауылдағы 195 мектептерге таратылып цифрлық білім беру ресурстарына интернетсіз қол жеткізуде. Түркістан қаласында орналасқан №23 IT мектеп-лицейінде оқушылар соңғы үлгідегі ақылды техникалармен толықтырылған. Қағазбастытылықтың да жойылу ұшқыны көрініп тұр. Енді оқушыларда күнделік, ал мұғалімдерде журнал жоқ. Барлығы электронды түрде жүзеге асырылуда.
Білімді ұрпақ-елдің жарқын болашағы. Бүгінде осындай ұрпақ тәрбиелеу жолында түрлі қызметтер атқарылып жатыр. Тек білуге ұмтылған оқушылар мен жұмысына жауапкершілікпен қарайтын ұстаздар болса болғаны.
Тоғжан Нарбай.
