Биыл оқушыларға арналған жаңа оқулықтар үлкен қоғамдық бағалау мен ғылыми-педагогикалық сараптамадан өтті. 3, 6, 8 сыныптарға арналған оқулықтарды оқу үрдісіне енгізу бойынша ҚР БҒМ тарапынан бірқатар жұмыстар жүргізілді. Барлық оқулықтар республиканың 30 пилоттық мектебінде ғылыми-педагогикалық сараптама мен апробациядан өткізілді. Оқулықтарды қоғамдық бағалауды ұйымдастыру бойынша қыруар жұмыстар атқарылды.
Оқулықтарды сараптамадан өткізу барысында 3, 6, 8 сыныптарға арналған оқулықтардың макеттері «Оқулық» Республикалық ғылыми-тәжірибелік орталығының «Қоғамдық бағалау» порталына орналастырылған болатын. Қоғамдық бағалау порталының іске қосылғаны туралы ақпарат әлеуметтік желілер арқылы таратылып, білім басқармалары мен жоғары оқу орындарына ақпаратты қалың жұртшылыққа жеткізу қажеттілігі туралы xат жіберілді. Нәтижесінде порталға педагогтар мен ата-аналар қауымдастығынан биылғы жылы 4 мыңнан астам ескертулер мен ұсыныстар келіп түсті. Оқулықтарды жетілдіру барысында барлық ескертулер мен ұсыныстар ескерілді.
3, 6, 8 сыныптарға арналған оқулықтардың мазмұнымен педагогтарды таныстыру мақсатында өткен жылғы қараша айында еліміздің барлық өңірлерінде әдістемелік семинарлар өтті. Аталмыш шараларға оқулықтардың 160 авторлары мен 7 мыңнан астам мұғалімдер мен әдіскерлер қатысты. Кездесулерге қатысушылар оқулықтардың құрылымы мен мазмұны бойынша өз ұсыныстары мен ескертулерін айтып жеткізді.
Оқулықтардың сапасын арттыру үшін сараптама қорытындысын қарастыру бойынша құрылған пәндік комиссия құрамы 120 адамнан ұлғайтылды. Комиссияға ҚР Парламенті Мәжілісінің депутаттары, қоғамдық ұйымдардың өкілдері кірді. 3, 6, 8 сыныптарға арналған оқулықтар пәндік комиссиялардың екі отырысында қаралды.
Оқулықтардың лингвистикалық сараптамасы және әлеуметтік қабылдануын қарастыру мақсатында ҚР БҒМ алғаш рет жаңа жұмыс тобын ұйымдастырып, жұмыс тобына оқу литературасының сарапшылары, үздік мұғалімдер мен А.Байтұрсынов атындағы тіл институтының қызметкерлері, журналистер және қоғам өкілдері, жалпы саны 74 адам мүшелік етті. Жұмыс тобының барлық ұсыныстары оқулықтар мен оқу-әдістемелік кешендерді қорытынды басып шығару барысында ескерілді.
ҚР БҒМ баспасөз қызметі.
