Қазақ даласынан майданға аттанып, қиянкескі соғыста шыбын жанын пида еткен жауынгерлердің бейіті жат жерде ескерусіз қалуда. Есесіне орыстың тәуелсіз із кесушілерінің табанды тірлігі бертін келе есімдері табылған талайларды жақындарымен қауыштырып, қайта жерлеуге мұрындық болып келеді. Тіпті, Отан үшін от кешіп, қан майданда қаза тапқан ардақтыларымыздың сүйегі мүмкіндігінше елге жеткізіліп жатыр. Кезекті қуанышты хабармен үстіміздегі жылдың ақпан айында таныстық. Ресей Федерациясының Курск облысы Поныри ауданында оңтүстікқазақстандық жауынгер Пірәлі Ахмамбековтің сүйегі табылыпты. Іздестіре келе, ол Сайрам ауданының Шапырашты ауылының азаматы болып шықты. Жан-жақты жүргізілген зерттеу барысында жауынгердің табылған туыстарына қуанышты хабар да жеткізілді. Араға көп уақыт өтпей Сайрам ауданы, Шапырашты ауылының тұрғыны Ержан Тұяқбайұлы «Айғақ» телеарнасына өтінішін жолдап, Ресей Федерациясы, Курск облысы, Поныри ауданында Ұлы Отан соғысы кезінде туған елін, жерін азат етемін деп жастанған туысқаны Ахмамбеков Пірәлінің табылған сүйегін Оңтүстік Қазақстан облысына алып келіп, қайта жерлеу үшін ықпал жасауды сұранады.
Арасы 1 айдың көлемінде Курск облыстық әкімдігімен арнайы бағдарлама жасаған «Айғақ» телеарнасының басшысы, облыс әкімі Жансейіт Түймебаевтың бастамасымен облыстық мәслихат депутаты Дулат Әбіш арнайы делегация құрып, жат жердегі соғыс майдангерінің сүйегін елге әкелмек. 1- мамыр күні Ресейге жол жүрген түсірілім тобы Сайрам ауданындағы Шапырашты ауылында ұзақ жылдар қызмет атқарған ардагер ұстаз Мұхтар Ұзақов, аудан әкімінің орынбасары Мадияр Оразалиевтермен 2017 жылы 3 мамыр күні Курск облысы Поныри ауданынан атқарушы органдары жерлесіміз Пірәлі Ахмамбековтың сүйегін табыстау қаралы митингісін және дәл осы күні Курск облысы Солнцевский ауданында ОҚО, бұрынғы Қызылқұм қазіргі Шардара ауданынан соғысқа аттанып, ерлікпен қаза тапқан аға сержант И.Кабановтың медалін митинг-реквием барысында Оңтүстікқазақстандық делегацияға салтанатты түрде тапсырылмақ.
Елбасы Нұрсұлтан Назарбаев айтқан туған жер құндылығын түлету мен «Болашаққа бағдар: рухани жаңғыруға» деген қадам осындай ізгілікті істердің бастауы болмақ.
Салтанат Тойболова
