Қоғамдық кеңес мәжілісі өтті. Мәжілісте кеңес мүшелері қала әкімінің есебі мен баяндамашылардың баяндамасын бұған дейінгі жиналыстарда тыңдап, естіп қойғаннан кейін, барлығы бірауыздан сұрақ-жауапқа көшті.
ОҚО кәсіподақтар кеңесі оқу орталығының төрағасы Ғани Қарабеков қала әкіміне таксопарктер туралы сауал қойды.
«Көмешбұлақ, Қатынкөпір, Леңгір және Гипер Хаус таксопарктеріндегі ретсіздікті қалай шешуге болады?» деген сұраққа қала әкімі Ғабидолла Әбдірахымов былай деп жауап берді:
– Аталған таксопарктер қоғамдық көлік қозғалысы мен жолаушыларға көп кедергі келтіруде. Екі апта бұрын дәл осы мәселе бойынша арнайы жиналыс өткізген болатынбыз. Ол парктерді еуропалық қалалардың үлгісіне сай жаңартқалы жатырмыз. Бұл автопарктерге тек арнайы тіркелген маршруттар ғана кіре алады. Ал жолаушылар емін-еркін, ешқандай кедергісіз кіріп шығатын болады. Дәл қазіргі жағдайда жоғарыда аталған таксопарктердің мәселесіне тыйым сала алмаймыз. Арнайы жол белгілерін орнату арқылы реттейміз, -деді әкім.
Қоғамдық кеңес мүшесінің бірі қалада транспорт және жол бойынша көптеген ілкімді істердің атқарылғанына тоқталды. Жолайрықтардың көптеп салынғаны соншалық, шаһарда бұрын-соңды мұнша көп жол жүруге ыңғайлы тротуарлар болмағанын алға тартты.
«Алайда, аялдама мәселесіне келгенде, әлі де жүйесіздік бар. Осыны қалай реттеуге болады?» деген сауалға әкім бүгінде көп аялдамалардың жеке меншікке өтіп кеткенін, кейбірінің келісімшартпен жұмыс істейтінін айтты.
– Алдағы 2 айдың ішінде қала бойынша 104 жаңа аялдама орнатылатын болады. Оның басым көпшілігі қалаға жаңадан қосылған елдімекендерге тиесілі. Кейбір аялдамалар дүкенге айналып кеткен. Біз аялдама басшыларына бір-ақ талап қойып отырмыз: Сәулет және қала құрылысы басқармасының жобасының негізінде салынуға тиіс! Өйткені, аялдама – қала көркі. Әрқайсысы өзімбілермендікке салса, шаһар келбетіне әсер етуі мүмкін, — деді Ғабидолла Рахматоллаұлы.
Қала әкіміне «Шымқалаға қыс мезгілінде ағаш көшеттер отырғызу жұмыстары жүргізілді, осы қыс маусымында отырғызылған қылқан жапырақты ағаш көшеттері жерсініп кете ме?» деген де сауал қойылды.
– Қонаев, Арғынбеков, Темірлан тас жолы бойынан арша ағаштарын алып тастадық. Себебі, жол бойына тым жақын егілген де, жақсы өспей қалған. Оның орнына Қырым қайыңын егудеміз. Ол жылына 20 см-ге дейін өседі. Жалпы, біздің қаламыз көктем мен жазда жасыл желекке оранып, әдемі рең алады да, қыста қоңырқай тартып, бірде сұрланып кетеді. Сол үшін орталықтағы көшелерге шынар мен талшын ағаштарын отырғызып жатырмыз, -деп жауап берді Ғ. Әбдірахымов.
Мәдени сала да қоғамдық кеңестің назарынан тыс қалған жоқ. Қала бойынша мәдени мекемелердің іс-шараларын, жобаларын жарнамалау жағы кемшін түсіп жатқанына тоқталған кеңес мүшесі жарнама үшін театрлар мен бірлестіктер қыруар қаржы жұмсап жатқанын тілге тиек етіп, базынасын айтты. Әкім көп созбай, мәдени ошақтарға Қонаев бойындағы телеэкраннан тегін жарнама, бейнеролик, билборд ілуге рұқсат ететінін жеткізді.
Мәжіліс соңында жиналғандар бірауыздан Қоғамдық кеңестің қарарын қабылдады.
Шымкент қаласы әкімінің баспасөз қызметі