Францияның Қазақстан Республикасындағы Төтенше және өкілетті елшісі Оңтүстікке іс-сапармен келді. Делегаттардың құрамында ынтымақтастық және экономика саласымен байланысты мамандар бар. Француздық өкілдердің біздің өңірге келудегі негізгі мақсаты инвестиция құятын кәсіпті анықтап, қандай саламен байланыс жасау керектігін нақтылау екен. Облыстық мәслихаттың депутаттарымен кездескен жиында осы мәселелер талқыға түсті.
Оңтүстік Қазақстан облысы мәслихаты хатшысының міндетін атқарушы Әбілқасым Досболов пен бірқатар депутаттар мәжіліс залға белгіленген уақыттан бұрын жиналды. Франция елінің өкілдерін күтіп алып, қазақтың қонақжайлығын көрсету мақсатында. Басқосуда ең әуелі өңірдегі мәслихаттың құрамы мен жұмысы таныстырылып, бюджеттің қауқары баяндалды.
Қазақстандағы халқы көп аймақ Оңтүстік. Осыны ескеріп келген мәртебелі меймандар шекаралас жатқан Өзбекстанмен қарым-қатынасты сұрады. Этно байланысқа қызығушылық танытқандарға достықтың мықты екендігі туралы жауап қатты. Франция мен Қазақстанның арасындағы тарихи байланыс ерекше. Әнші Әміре Қашаубаев, Мұстафа Шоқай табан тіреген мемлекетпен байланысты одан әрмен нығайту қажет. Бұған Созақ ауданында уран өндіріп жатқан «Катко» компаниясының көмегі болса деген ұсыныс болды.
Депутаттар мұнан өзге шетелдік қонақтарға Оңтүстіктің мүмкіндігін түсіндіруге тырысты. Яғни инвестиция құятан кәсіпкерлер болса ауылшаруашылық немесе өзгеде бағыт бойынша әріптестік орнатуға әзір. Францияның Қазақстандағы Төтенше және өкілетті елшісі Франсис Этьен бірлескен жобаларды жүзеге асыру үшін виза мәселесін алға тартты. Яғни алдағы жылдың 1 қаңтарынан бастап виза ұзақтығы 30 күнге ұзартылмақ. Осыны айта келе жерді жалға алу бойынша да бірнеше сұрақтарды көтеріп, Ақтөбе мен Париж қалаларында орын алған лаңкестік оқиға туралы да сөз етті. Әрине екі жақтың өкілдері тек ынтымақты алға тартты
Жұмыс сапары екі күнге жалғасатын франциялық делегаттарға облыстың инвестициялық мүмкіндігі таныстырылған соң, Қазақстандықтардың тарапынан сый болды. Ұлы ақын Абай Құнанбаевтың мүсіні табысталып, екі жақтың өкілдері бір-бірімен байланыс алмасты.
Бағлан Байкөбекқызы
