ҚР Президенті Н.Назарбаевтың Жарлығымен елімізде 31 мамыр – Саяси қуғын-сүргін құрбандарын еске алу күні болып белгіленген. Осы атаулы күнге орай бүгін Шымкенттегі «Қасірет» мемориалында нәубет жылдары қаза тапқандарды еске алу шарасына облыс және қала басшылығы, зиялы қауым өкілдері, мәслихат депутаттары мен қала тұрғындары қатысты. Іс-шараға қатысушылар алдымен мемориалдағы «Ана мен бала» ескерткішіне гүл шоқтарын қойды, жазықсыз жапа шеккен репрессия құрбандарын бір минут үнсіздікпен еске алды.
Халық арасында «Албастысай» атауына ие болған орындағы іс-шара осылай аяқталды. Айта кетейік, репрессия жылдары құрбан болып, жазықсыз қаза тапқандардың басым бөлігі дәл осы маңда жерленген. Өкінішке орай, боздақтарымызды еске алу күнінде ел үшін жанын қиған жандардың рухына Құран бағышталмады. Шараны ұйымдастырушылар облыстың бас имамы Ахметжан қажы Керімбекті неліктен шақырмады? Бұл жағдай бізге белгісіз? Көңілге кірбің ұялатты.
Ал, осы маңнан алыс емес тұста бауырластар зираты бар. Онда талай мұсылман бауырларымыз жатыр. Құран аяттары оқылғанда артық болмас еді-ау. Мұсылмандық дәстүр ұмыт қалған шарада қаралы митингінің өзі дұрыстап ұйымдастырылмаған. Сөз алып, абзал арыстарымыз жайында түрлі естеліктер айтылатын орын да дәл осы «Қасірет» мемориалы еді. Елім деп есіл кеткен арда азаматтарға өз деңгейінде құрмет көрсете алмауымыз үлкен сын емес пе?
Еске сала кетсек, 1935-1938 жылдар аралығында елiмiздiң бiртуар азаматтары жаппай қуғын-сүргiнге ұшыраған. Кеңес өкiметi халықтарының 4 миллионнан астам азаматы саяси қуғын-сүргін мен ашаршылықтың құрбанына айналды. Сол жылдары Оңтүстiк Қазақстан облысы бойынша 2500 адам «Халық жауы» деп атылды. Сұрапыл саясаттың салдарынан 507 мың қарашай, шешен, 180 мың қырым татарлары мен 110 мың поляктар тағы да көптеген ұлт өкiлдерi Оңтүстiк Қазақстанға күштеп жер аударылды.
