Жүз он мыңға тарта тұрғыны бар Түлкібас ауданының әкімі Қайрат Әбдуәлиев БАҚ өкілдеріне 2015 жылы атқарылған жұмыстар бойынша есеп берді. Негізінен ауыл шаруашылығы мен кәсіпкерлік салалары бойынша табысты жұмыс жасап жатқан ауданның жалпы өңірлік өнім көлемі былтыр 37 млрд. 852 млн. тенгені құраған. Ал оның 19 млрдқа жуығы ауыл шаруашылығы саласына тиесілі болса, өнеркәсіп саласында да өсім байқалады. Әсіресе алма бау шаруашылығын ендіруде көш бастап тұрған Түлкібас өңірінде туризм саласын жандандыруға қатысты бірқатар ауқымды бастамалар қолға алынып отырған жайы бар.
БАҚ өкілдеріне ағымдағы жылы атқарылған жұмыстарды баяндаған Түлкібас ауданының әкімі Қайрат Әбдуәлиев өз есебін алдымен қаржы, экономикалық әлеуетінен бастады. Айтуынша ауданның нақтыланған бюджет көлемі 11 млрд. 832 млн. тенгеге таяп, 112,5 пайызға орындалған. Ал өнеркәсіп саласында 2015 жылы 18 млрд. 754 млн. тенгенің өнімі өндіріліп, сәйкес мерзіммен салыстырғанда нақты көлем индексі 105,1 пайызға жетіп отыр екен. Сондай-ақ, шағын және орта кәсіпкерлік саласында өнірілген өнім көлемі 32 млрд. 789 млн. тенгеге жетіп, бұл саладан жергілікті бюджетке түскен салық көлемі 258 млн. тенгені құраған. Түлкібас өңірінің ауыл шаруашылық саласында да серпіліс мол. Айталық мал басы және одан алынатын өнімдер 2014 жылдың тиісті кезеңімен салыстырғанда асыра орындалып, өткен жылы 600 гектар жерге тамшылатып суару технологиясы ендірілген.
Сонымен қатар, пайдаланылмай бос жатқан жерлерді түгендеу жұмыстарының нәтижесінде 639 гектар жер мемлекет меншігіне қайтарылыпты. Әсіресе ауданда алма бауларды қайта жаңғырту жеміс-жидекті аймаққа айналдыру мақсатында 2015 жылы 725 гектар жерге алма бау егіліп, бүгінде алма алқаптарының көлемі 2791 гектарға жетіп отыр екен. Ал, Түлкібас ауданының құрылыс саласында да былтыр қыруар тірлік атқарылған. Мәселен, дәл қазіргі таңда аймақ бойынша 32 және 64 пәтерлік екі тұрғын үйдің құрылысы жүріп жатыр екен. Міне осының нәтижесінде биылғы жылы 96 отбасыға тұрғын үй кілтін тапсыру жоспарлануда. Сондай-ақ, аудандағы апатты мектептер мәселесін шешу мақсатында облыстық және аудандық бюджет қаржысы есебінен өткен жылы 4 мектеп салынып пайдалануға берілсе, биыл қыркүйек айына дейін тағы 4 білім мекемесінің құрылысы аяқталып тапсырылады деп күтіліп отыр. Осылай деген Қайрат Амангелдіұлы ауданда елді мекендерді ауыз су және көгілдір отынмен қамту көрсеткіші биыл 100 пайызға жететіндігін айтады. Мұнан өзге денсаулық сақтау, спорт, мәдениет салалары бойынша атқарылған жұмыстар мен ауданның әлеуметтік саладағы көрсеткіштеріне жан-жақты тоқталған Қайрат Амангелдіұлы БАҚ өкілдерінің сан салалы сауалдарына да жауап берді.
Абай Омар
