Елбасы Жарлығына сәйкес барлық денгейдегі әкімдердің халық алдында есеп беру кездесулеріне сәйкес Шымкент қаласының әкімі Ғабидолла Әбдірахымов та шаҺар тұрғындары алдында 2015 жылы атқарылған жұмыстарды баяндап өз есебін қорытындылады. Өткен жылдың жетістіктері мен шешімін тапқан мәселелер айтылып тұрғындардың талап-тілектері тыңдалған басқосуда еңбегіне қарай әкім жұмысы да бағаланып жатты.Шымкент қаласының әкімі Ғабидолла Әбдірахымовтың 2015 жылдың қорытындысы мен алда тұрған міндеттері туралы есепті кездесуіне шаһарға қарасты 4 ауданның тұрғындары мен әкімдікке қарасты бөлім басшылары, ардагерлер, облыстық және қалалық мәслихат депутаттары, зиялы қауым өкілдері және құқық қорғау органдарының басшылары қатысты. Сондай-ақ, есепті кездесуге облыс әкімі Бейбіт Атамқұлов пен Президен әкімшілігінің мемлекеттік инспекторы да арнайы келген. Осы орайда милионды қала атануға нық қадам басқан Шымкент шаһарында 2015 жылы атқарылған ауқымды жұмыстар алдымен арнайы бейне экран арқылы көпшілік назарына ұсынылды. Тек өткен жылдың өзінде талай әлеуметтік мәселелер өз шешімін тауып мемлекеттік бағдарламалар аясында қыруар жұмыстар атқарылғандығы жан жақты талданған арнайы бейнематериал көрсетілімінен соң қала басшысы Ғабидолла Әбірахымов баяндама жасап негізгі салалардағы көрсеткіштерге тоқталып өтті. Оның айтуынша өткен жылдың қорытындысы бойынша шахардың жалпы әлеуметтік дамуын сипаттайтын негізгі көрсеткіштерде өсім бар. Мәселен былтыр жергілікті халық саны 884 мың 100 адамды құрап 2014 жылмен салыстырғанда 24,7 пайызға өскен. Ал өнеркәсіп өнімінің көлемі 289 млрд 100 млн тенгеге жетіп 3,7 пайызға артып отыр екен.
Ауыл шаруашылығы саласының үлесі де 9 пайызға ұлғайған. Осылай деген қала әкімі тұрғындар үшін бірінші кезекте шешімін табуды қажет еткен өзекті мәселелердің де шешілу барысына тоқталды. Сондай-ақ, инженерлік инфрақұрылымды дамыту бағытында ауыз сумен қамтамасыз ету, және кәріз жүйелері бойынша 2015 жылы жергілікті бюджеттен 13 жобаны жүзеге асыруға 1 млрд 697 млн қаржы бағытталған. Нәтижесінде 2 шағын ауданда ауыз су құбырларының құрылысы аяқталып, 30 мыңнан астам тұрғындар ауыз сумен қамтамасыз етілген. Ал 9 шағын ауданды электрмен қамтамасыз ету жұмыстарын сәйкес былтыр 3 елді мекендегі электр желісінің құрылыс жұмыстары толық аяқталып, 29 мыңнан астам халықты сапалы электр қуатымен қамтамасыз етуге мүмкіндік жасалған. Шымкент қаласында демографиялық өсімнің жоғары болуына байланысты оқушылар санының өсімі заңды құбылыс. Сондықтан қалада білім нысандарын дамыту басты міндеттердің бірі. Осылай деген Ғабидолла Әбдірахымов 2015 жылы жалпы саны 18 білім беру мекемелерінің құрылыстары жүргізіліп 10-ы пайдалануға берілгенін атап өтті. Оған қоса былтыр 6 мектеп пен 7 балабақшаға күрделі жөндеу жұмыстары жүргізілген. Міне осындай кешенді жұмыстар нәтижесінде биыл Шымкентте апатты мектептер мәселесі 100 пайыз шешімін тапқалы отырса, 2018 жылы үш ауысымды мектептер проблемасы да толықтай шешімін таппақ. Осылайша жан-жақты талдаулар жасай отырып алдағы мақсат міндеттерге тоқталған әкім жұмысын мінбеге шығып сөз алған азаматтар да жоғары бағалап, көкейтесті ұсыныс пікірлерін де ортаға салып жатты.
Міне осылайша мінбеге шығып сөз алған азаматтардан соң есепті жиынға қатысқан көпшілік қала әкіміне тікелей сұрақтарын да қойып жатты. Айта кету керек тұрғындарды толғандырған мәселелердің көпшілігі жолдардың жайы мен көшелерді жарықтандыру, балалар ойын алаңшаларына қатысты. Бұл күні сауал жолдаған азаматтардың басым бөлігі осындай мазмұндағы аудан денгейінде-ақ жергілікті әкімдермен шешілетін мәселелерді айтып жатты. Ал бұған дейін Шымкент қаласына қарасты 4 бірдей аудан әкімдері кем дегенде үш реттен өз аудандары аумағында есеп беріп үлгергендерін ескерсек бұл күнгі сауалдардың көпшілігі сол есепті кездесулерде қойылу керек еді. Алайда Шымкент қаласының әкімі Ғабидолла Рахматоллаұлы қойылған сұрақтардың ешбірін де жауапсыз қалдырмады. Милионды шаһарға әкім болып тағайындалғалы 5-айға жуық уақыт ішінде тындырымды тірліктер жасай білген басшы әрбір азаматтың сауалына мұқият ден қойып, басым көпшілігін шешіп беруге уәде етті. Тіпті есеп беру жиыны екі сағатқа деп белгіленгенімен қойылған сауалдардың көптігі жиналыс уақытын үш сағатқа жуықтатты.Ал жиын соңында қорытынды сөз сөйлеген облыс басшысы Бейбіт Атамқұлов қаланың даму бағыттары жолындағы жұмыстарды жүйелей келе орамды ойлары мен ұсыныс пікірлерін де ортаға салды. Бейбіт Бәкірұлы қала қазынасының да көлемі жыл санап артып келе жатқандығын айта келе бұл бағыттағы жұмыстарды жандандыра түсу қажеттігіне тоқталды. Бұл тұрғыда қала экономикасының қуатты болуы тікелей салық түсімдеріне байланысты. Үш сағатқа жуық уақытқа созылған есепті жиынға қатысып шыққан көпшілік қала әкімінің жұмысын лайықты бағалап жатты.
Абай ОМАР