Қасиетті Мұхаммед пайғамбарымыз дүниеге келген күн – Мәуліт мерекесінің іс-шарасы Оңтүстікте кеңінен атап өтілді. Рухани кеште алаштың айтулы өнерпаздары мен арқалы ақындары өнер көрсетіп, зиялы қауым өкілдері мен қалың бұқараның ықыласына бөленді. Мәуліт – араб сөзінен аударғанда «туылған күн» деген мағына береді. Яғни, айтулы күнде 571 жылы, Рабиул-әууал айының 12-сінде адамзаттың абзалы, пайғамбарымыз Мұхаммед с.ғ.с дүниеге келген. Сондықтан да осы ай, барша мұсылман қауымы үшін қуаныш пен шаттық мерекесі болып есептеледі. Діни тұрақтылық пен қоғамдық келісімді берік ұстанған Қазақ елінде бұл мереке бірнеше жылдан бері дәстүрлі атап өтілуде. Алланың соңғы елшісі Мекке қаласындағы Абдуллах пен Әминаның жанұясында дүниеге келген. Осы сәтте әлемде түрлі ғажайып оқиғалар орын алған деседі.
Пайғамбардың өмір есігін ашқан сәтін Оңтүстік өнерпаздары шебер көрсете білді. Шынайы орындалған сахналық қойылым жұртшылықтың көңілінен шығып, көзіне жас келтірсе, бауырмалдыққа, ізгілікке үндеген әндер мендін жайындағы салауат өлеңдерді халыққа арнаған өнерпаздар көптің ықыласына бөленді. Арқаның айтулы ақындары, жергілікті суырып салма сөз шеберлері Біржан Байтуов пен Нұрлан Есенқұловтар да рухани кешке үлестерін қосты. Ислам діні жайында сөз өрбіткен айтыскерлер, қоғамдағы орын алып жатқан өзекті мәселелерді де тілге тиек етіп, жұртшылықты сабырға шақырды. Тұғырлы Тәуелсізке қол жеткелі халықтың дінге деген көзқарасы оңынан қалыптасып, имандылыққа бой ұра бастаған. Мұны концерт залына жиналған қалың көпшіліктің қарасы-ақ аңғартады. Осы тұста жамағатқа уағыз айтқан дін өкілдері бұқараны жат ағымның жетегіне ермеуге, дәстүрлі дініміз исламның Әбу Ханифа мазғабын ұстануға шақырды. Ал көпті көрген қарияларды иманды жастардың қатарының көбеюі қуантады екен.
Әбдімүтәлі ЖҰМАШ
