Бүгін өңір басшысы Бейбіт Атамқұловтың қатысуымен Оңтүстік Қазақстан облыстық мәслихатының кезектен тыс қырық бесінші сессиясы өтті. Онда ҚР Ішкі істер министрі Қ.Қасымовтың ұсынысымен, облыстық мәслихат депутаттарының қолдауымен, облыс әкімінің өкімімен ОҚО ІІД жергілікті полиция қызметінің бастығы лауазымына Балтабек Абылаев тағайындалды. Жиында сөз алған облыс әкімі жергілікті полиция қызметі Мемлекет басшысы Н.Назарбаевтың Ұлт жоспары – «100 нақты қадам» негізінде құрылғанын айтты.
Балтабек Сейілбекұлы Абылаев – 1962 жылы туған. ҚР ІІМ Қарағанды жоғары мектебін бітірген. 1990 жылдан бастап ішкі істер саласында қызмет етіп келеді. Б.Абылаев жаңа қызметіне дейін ОҚО ІІД Көші-қон полициясы басқармасының бастығы қызметін атқарып келген. Сонымен қатар, кезектен тыс сессияда облыстық мәслихаттың хатшысы Құдайберген Ержан қоғамға еңбегі сіңген бірқатар азаматтарға «Қазақстан мәслихаттарына 20 жыл» мерекелік медалін табыстады. Құрметке ие болғандардың ішінде ҚР Парламенті Сенатының экс-депутаты Орынбай Рахманбердиев, ҚР Парламенті Мәжілісінің депутаты Шалатай Мырзахметовте бар.
