Бүгін Шымкенттік 58 отбасы жаңа пәтерге қол жеткізді. «Нұрсәт» мөлтекауданында «Қолжетімді баспана – 2020» бағдарламасы аясында салынған №56 көпқабатты тұрғын үй құрылысы толығымен аяқталып, пайдалануға беріліп отыр. Қуаныш иелерін облыс әкімінің бірініші орынбасары Дархан Сатыбалды мен қала басшысы Ғабидолла Әбдірахымовтар арнайы құттықтап, пәтер кілттерін салтанатты түрде табыс етті.
«Қолжетімді баспана – 2020» бағдарламасы 3 бағыттан тұрады. Бірінші бағыты бойынша ҰОС ардагерлері, ата-анасының қамқорлығынсыз қалған балалар мен әлеуметтік жағдайы төмен отбасылар және мемлекеттік қызметшілер тұрғын үйге қол жеткізе алады. Коммуналдық тұрғын үй алуға тіркелген осындай азаматтардың саны облысымызда 19 772-ні құрайды екен. Осы лекке жататын 58 отбасы бүгін өз баспаналарының табалдырығын аттамақ. 76 жастағы Тасболат қария жары Күлтай апа екеуі бүгін көптен күткен қуаныштарына қол жеткізді. Ұлағатты ұстаз ұзақ жылдар бойы білім беру саласында еңбек етіп, Ыбырай Алтынсарин медалін иеленген Арыс қаласының «Құрметті азаматы». Тұрғын үйге ие болу үшін жастарға аянбай еңбек етуді үндейді.
Осылайша биыл жыл соңына дейін Шымкентте 2700-ден аса азамат өз баспаналарына қол жеткізбек. 2015 жылды жаңа пәтерде қарсы алып жатқан тұрғындарға қоныс құтты болсын демекпіз!
