Ызғарлы желтоқсанның 9-нда қазақ журналистикасы тағы бір тарланынан айырылды. Сәрсенбіде Түркістанның тумасы, талантты журналист Нұрмахан Оразбек өмірден озды. Нұрмахан Оразбек 1937 жылы 1 желтоқсан күні Түркістан ауданы, Қандөз ауылында туылған. Журналист, жазушы, баспагер, Қазақстанның еңбек сіңірген қайраткері. Шорнақ ауылындағы орта мектепті бітірген соң 1955 – 57 ж. Алматы облысындағы «Іле» кеңшарында, Соколов-Сарыбай кен байыту комбинатында жұмыс істеген. Қазақ мемлекеттік университетінің журналистика бөлімшесін бітірген. 1962 – 73 ж. Қарағанды облысының Жезді аудандық «Октябрь туы», Оңтүстік Қазақстан облысының Түркістан аудандық «Коммунистік еңбек» газеттерінде, «Лениншіл жаста» Қазақстан Жастар Одағының Орталық Комитетінде, «Социалистік Қазақстан » газетінде, Партия тарихы институтында әртүрлі қызметтер атқарды. 1974 жылы Қазақ ақпарат агенттігіне бас редактор, 1982 жылы директордың орынбасары болып тағайындалды. 1988 – 91 жылдары Қарағанды облыстық «Орталық Қазақстан» газетінің бас редакторы, ағылшын тілінде шыққан республикалық «Қазақстан» газетінің бас редакторы болды, 1995 жылдан «Қазақстан» баспасының директоры, сонымен бір мезгілде 2000 – 2002 ж. республикалық «Ақиқат» журналының бас редакторы қызметін атқарды. «Құрмет» орденімен, үш медальмен, Қазақ КСР Жоғарғы Кеңесі Төралқасының Құрмет грамотасымен марапатталған.
«Қарсыбай Сыпатаев», «Құрбанбай Ырысбеков», «Капитал қамалындағы 18 күн», «Қасиеттісің, сен Отан!», «Қағажу көрген өмірден», «Бар айласы – бас пайдасы», «Мұхиттың арғы жағы, бергі жағы», «Шапық Шөкин» атты кітаптары жарық көрген. Атақты Оксфорд Университетінің «Саясаттану», «Әлеуметтану» түсіндірме сөздіктерін түпнұсқадан аударған. Жерлесіміздің мезгілсіз қазасына қайғыра отырып, отбасына, туған — туыстарына көңіл айтамыз. Жатқан жері жайлы, топырағы торқа болғай!
