Шымкент қалалық мәслихаттың кезектен тыс 52-сессиясында депутаттар 2015 жылғы шаһар бюджетін соңғы рет нақтылап, өзгерістер енгізді. Атап айтар болсақ, биылғы бюджеттің кіріс көзінде өзгеріс жоқ. Тек, үнемделген 100 млн теңге қайта бөлінді. 53 млн теңге қаладағы 160 қазандықтың құрылысын аяқтауға бағытталса, өзге қаражат бұрын басталған әлеуметтік нысандарды тәмамдауға жұмсалады. Өткен жылғы қала қоржынындағы қаржы 79 млрд теңге болса, биылғы бюджет 83 млрд теңгені құрады. Ал, Шымкент республикадағы үшінші қала саналатындықтан, миллионға жуық тұрғыны бар шаһарға бөлінетін қаржы да бүгінгісінен әлдеқайда артық болуы тиіс.
Мәселен, автомобиль жолдарын жөндеу және дамытуға Астанада 38,5 млрд. теңге, Алматыда 29,7 млрд. теңге бөлінсе, Шымкентте 6,6 млрд. ғана бөлінген. Қаланың санитарлық тазалығы бойынша Шымкентте бұл салаға 2,5 млрд теңге қаржы қарастырылған. Ал, Астанада 25,5 млрд, Алматыда 9,8 млрд. теңге. Аумағы жағынан Астана мен Алматыдан үлкен шаһарға бөлінетін бюджеттің де көлемі аз болмауы керек. Бұл туралы Шымкент қаласының 2020 жылдарға арналған даму тұжырымдамасын жасаған қала әкімі Ғабидолла Әбдірахымов айтып өтті.
БҮГІНГІ ТӘРБИЕ – ЕРТЕҢГІ БОЛАШАҚ
Ата сөзі ақылдың көзі. Ұлттық құндылықты ұлықтап, ұрпақтар сабақтастығын жалғау мақсатында Шымкент қаласының ардагерлері мен зиялы қауым өкілдері бір алаңда...
