Арыс қаласының әкімі Ертай Сейіт БАҚ өкілдеріне 2015 жылдың 10 айында атқарылған жұмыстар бойынша есеп берді. Оның айтуынша, шағын қалаларды дамыту бағдарламасына енген шаһардың барлық саласында дерлік серпіліс бар. Айталық, соңғы нақтыланған бюджет көлемі 9 млрд. тенгеден асса, салық түсімдері 2014 жылдың тиісті кезеңімен салыстырғанда 1 млрд. тенгеге ұлғайған. Оған қоса Арыста өнеркәсіп өнімінің көлемі артып, кәсіпкерлік саласы да қанатын кеңге жайып келеді.
Шахардың нақтыланған бюджет көлемі 9 млрд. 110 млн. тенгеге таяп, 1 млрд. 800 млн. тенгеге ұлғайған. Ал өнеркәсіп саласында 2015 жылдың 10 айында 6 млрд. 645 млн. тенгенің өнімі өндіріліп, сәйкес мерзіммен салыстырғанда нақты көлем индексі 106 пайызға жетіп отыр екен. Сондай-ақ шағын және орта кәсіпкерлік саласында өнірілген өнім көлемі 580 млн. тенгеге артса, жұмыспен қамтылғандар саны 294 адамға артып 7641-ді құраған. Арыс өңірінің ауыл шаруашылық саласында да серпіліс мол. Айталық, мал басы және одан алынатын өнімдер 2014 жылдың тиісті кезеңімен салыстырғанда асыра орындалып, биыл 22,5 мың гектар егістік жер игерілген. Сонымен қатар, биыл 3 гектарға жылыжай салынып, 939 гектар аумаққа тамшылатып суару технологиясын ендірілу нәтижесінде жылдық жоспар толығымен орындалып отыр екен. Ал мемлекеттік «Сыбаға» бағдарламасы бойынша 1700-ден астам ірі қара алынып тапсырма 142 пайызға орындалса, «Алтын асық» бағдарламасы бойынша Арыс өңірі 900 бас мал алу межесін 1962 басқа жеткізген.
Ал, Арыс қаласының құрылыс саласында да биыл қыруар тірлік атқарылған. Мәселен дәл қазіргі таңда аймақ бойынша 2016-2017 жылдарға өтпелі 6 бірдей білім мекемесінің құрылысы жүріп жатыр екен. Оның екеуі облыстық бюджет қаржысы есебінен салынып жатса, қалған төрт нысан жергілікті бюджет есебінен бой көтеруде. Осылай деген Сейіт Мырзақұлұлы бұдан өзге биыл 9 мектеп пен бір балабақшаға күрделі жөндеу жұмыстары жүргізілгендігін айтады.
Оған қоса, Республикалық бюджет есебінен бөлінген 300 млн. қаржыға биыл заманауи үлгідегі «Дене шынықтыру-сауықтыру кешені» пайдалануға берілсе, Қалалық мәдениет үйі ғимараты қайта жаңғыртудан өткен. Осылайша Арыс қаласындағы жалпы құрылыстардың қаржы көлемі 3 млрд. 768 млн. тенгені құрап отыр. Бұған қоса қаланың биыл бірнеше көшесі күрделі жөндеуден өтіпті. 
Мұнан өзге, «Жұмыспен қамту 2020 жол картасы», «Өңірлерді дамыту» бағдарламаларының орындалу барысына тоқталған қала әкімі Арыстағы көпқабатты тұрғын үйлерді жылумен қамту, ауыз су мәселелерін шешу бағытындағы жұмыстарды да жан-жақты баяндады. Айталық биыл облыстық бюджет есебінен 209 млн. тенге қаржыға қаланың орталық жылу қазандығы жөндеуден өтіп, мәселе өз шешімін тапқан. Осылайша аймақта атқарылған ауқымды жұмыстарды баяндаған Ертай Мырзақұлұлы БАҚ өкілдерінің сан салалы сауалдарына да жауап берді. «Сөзден іске, істен сапаға» осылай деп ағымдағы жылдың 10 айында атқарылған жұмыстардың есебін берген Ертай Сейіт Арыс қаласы дамудың үлкен даңғыл жолында деп өз есебін қорытты.
Абай ОМАР
