Сәрсенбі күні «Нұр Отан» партиясы ОҚОФ төрағасының бірінші орынбасары, ОҚО грек-рим, еркін және әйелдер күресі федерациясының төрағасы Берік Оспанов 2015 жылдың 3-8 қараша аралығында Ақтөбе қаласында Қазақстан Республикасының Кубогы жолындағы сайысқа қатысып, жеңіспен оралған Оңтүстік Қазақстан облысының грек-рим күресінен құрама командасын қабылдады. Жалпы биылғы ел кубогы жолындағы бәсеке оңтүстікқазақстандық спортшылар үшін жемісті болды. Жарысқа еліміздің он бір облысынан 11 команда қатысқан. Алғашқы айналымда оңтүстікқазақстандық балуандар Жамбыл облысының құрама командасымен кездесіп, 6-2 есебімен жеңіске жетсе, келесі айналымда Алматы облысының мықтыларымен күресіп, 5-3 есебімен жеңіс жолын жалғады. 
Қарағандылық балуандармен өткен үшінші айналымда оңтүстіктің спортшылары өздерінің әбден ысылғанын әрі бабында екендігін дәлелдеді. Қостанайлық спортшылармен болған белдесуде 5-3 есебімен жеңіске жетті. Финалда Ақтөбе облысының балуандарын 5-3 есебімен тізе бүктіріп, Оңтүстік Қазақстан облысының командасы алғаш рет Қазақстан Республикасының Кубогын жеңіп алды. Облыстың грек-рим күресінен құрама командасындағы Асхат Жамбиров пен Әлімхан Сыздықов белдесулерді тек жеңіспен аяқтаса, Нұрсұлтан Қалмұрзаев, Жолдыбай Тоқбаев, Әділхан Сатоев, Рамазан Мұстафаев, Шәміл Батыров, Рашид Кочиев, Агит Сулейманов, Сәкен Сейітқалиев жеңіс жолында өздерінің бар күш-жігерін салып, күресті. Жалпы оңтүстікқазақстандық спортшылар сайыста нәтижелі өнер көрсетті. 
Бұл жеңіс ащы тер мен ерен еңбектің өтеуі. Осы тұрғыда облыстың ересектер арасындағы құрама командасының аға бапкері Абдрахман Архарбеков және жаттықтырушылар Бисолт Дециев, Нұрлан Жылқыайдаров, Хаким Мусаев, Александр Ершов, Саддат Гелашвилидің қосқан үлестері қомақты.
Спортшыларды, қабылдаған Берік Оспанов балуандар мен олардың жаттықтырушыларын жеңістерімен құттықтап: «-Біз марапат үшін емес оңтүстіктің атағын шығару жолында жұмыс жасауымыз қажет. Өңірде федерация құрылғалы жақсы нәтиже көрсетіп келеміз. Осы қарқыннан таймай Олимпиадаға жолдама алып, ел намысын лайықты қорғауларыңызға тілектеспін» – деді. 
Жиын барысында құрама команда мүшелері Кубокты облыстық федерация төрағасына табыстаса, Берік Оспанов спортшылар мен олардың жаттықтырушыларына федерация атынан қаржылай сый-сияпат жасап, марапаттады.
РУХАНИЯТ ЖАНАШЫРЫ ӨЗБЕКӘЛІ ЖӘНІБЕКОВКЕ – 95 ЖЫЛ
Наурыздың қайта оралуы, қасиетті Тайқазанның Түркістанға қайтарылуы, Алаш арыстарының ақталуы… Қазақ руханиятындағы осы тарихи оқиғалардың бәрі Өзбекәлі Жәнібековтің есімімен тығыз...
