Қазақстан Республикасы Конституциясының 20 жылдығына орай, Оңтүстік Қазақстан облыстық сотының ұйымдастыруымен өткен велошеру осылай деп аталады. Бүгінгі ұрпақтың от ауызды, орақ тілді би-шешендерге деген құрметінен туындаған шара салауатты өмір салтын насихаттауды да көздеп отыр. Бұл күні 40-тан астам сот қызметкерлері Шымкент қаласынан Ордабасы тауындағы «Бірлік монументіне» дейінгі 40 шақырымдық қашықтықты велосипедпен бағындырды. Ата заңымыздың әділдігін орнатып, ақ пен қараның аражігін ажыратып, үкім шығаратын сот қызметкерлері бұл жолы екі аяқты көлік құралын тізгіндеп көпшілікке үлгі болуды мұрат еткен. Велошеруге қатысуға жиналғандарға алдымен облыстық соттың төрағасы Нұрсерік Шәріпов пен облыс әкімінің орынбасары Ерлан Айтахановтар сәттілік тілеп, ата заңымыздың мерейлі мерекесімен құтықтады.
Сағатына 30-40 шақырым жылдамдықпен жүрген велошабандозшылар жол бойында мәреге дейін бірнеше рет аялдап, аз ғана уақыт бой жазып отырды. Бас –аяғы бір жарым сағат көлемінде шеруге қатысқан азаматтар Ордабасы тауына да келіп жетті. Шараны ұйымдастырушылар «Бірлік » монументіне гүл шоқтарын қойды.
Өз кезегінде патриоттық шараға жиналған жастар мен түрлі сала қызметкерлеріне ел Конституциясының халық өміріндегі алар орны мен қадір-қасиеті туралы баяндамалар оқылды.
Ерлан ОТАРБАЕВ
