Ауыл шаруашылығына бейім Оңтүстік өңірінің Теріскейі саналатын Созақ ауданының аграрлық секторында да соңғы жылдары серпіліс байқалады. Айталық аудан аумағы бойынша биыл 12 мың гектардан астам егістік жер игеріліп, дихандар қауымы еселі өнімге қол жеткізіп отыр. Сондай-ақ, көкөніс, бақша өнімдерін өсіруде де жергілікті шаруалардың биылғы межесі биік. Айталық, аймақ бойынша биыл 10 мың гектарға жуық алқапқа мал азықтық дақылдары егіліп, 180 гектарға бидай, 700 гектар дәндік жүгері және 300 гектарға көкөніс, 300 гектар бақша өнімдері егілген. Мұнан өзге Созақта мал шаруашылығын дамыту жұмыстарына басымдық беріліп отыр. Мәселен жергілікті шаруалар «Алтын асық», «Құлан» бағдарламаларын орындауда да белсенділік байқатуда. Сондай-ақ, мемлекеттік «Сыбаға» бағдарламасы аймақта табысты орындалып келеді. Өткен жылы 2 мың бас ірі қара алу тапсырмасын ойдағыдай орындап шыққан аудан бағдарлама шеңберінде биыл да 2 мың бас асыл тұқымды ірі қара алу ісін жалғастырып отыр.
Абай ОМАР
