60 МЛРД. ТЕҢГЕГЕ ЖУЫҚ 30 ЖОБА СҮЙЕМЕЛДЕУГЕ АЛЫНҒАН

Бүгін қала әкімдігінің ақпараттық-коммуникациялық орталығында «Сыбайлас жемқорлықтың алдын алу» мақсатында қалалық сыбайлас жемқорлыққа қарсы департаменті және «Шымкент-адалдық алаңы» жобалық кеңсесінің атқарған жұмыстары жайлы баспасөз брифингі өтті.

Спикерлер (ҚР Сыбайлас жемқорлыққа қарсы іс-қимыл Агенттігінің Шымкент қаласы бойынша департаменті басшысының бірінші орынбасары және Төлебаев Ерасыл Әшірбайұлы — «Шымкент – адалдық алаңы» жобалық кенсесінің басшысы) қоғамда сыбайлас жемқорлыққа қарсы мәдениетті қалыптастыруға, мемлекеттік органдар мен ұйымдарда парасаттылық пен ашықтық қағидаттарын енгізуге, сондай-ақ лауазымды тұлғалар тарапынан әкімшілік кедергілерді жою арқылы іске асырылатын механизмдерге кеңінен тоқталды.

Бизнесті қорғау, қолайлы инвестициялық жағдай жасау және кәсіпкерлер үшін сыбайлас жемқорлық деректері бойынша қысымдарды төмендету Агенттіктің басымды бағыттарының бірі болып табылады.

Осыған байланысты кәсіпкерлерді қорғауға бағытталған «Бизнес пен инвесторларды қорғау» жобасын іске асырылуда. Аталған жоба аясында мүдделі инвесторларға сыбайлас жемқорлық көріністерінен 100% қорғауға кепілдік беріледі.

Бүгінде қалалық Департаментпен жалпы сомасы 60 млрд. теңгеге жуық 30 жоба сүйемелдеуге алынған.

Өткен жылдың өзінде, бизнесті қорғау аясында 40 шақты шағын және орта бизнес кәсіпкерлерінің құқықтарын қалпына келтіруге қол жеткіздік, 9 лауазымды тұлға кәсіпкерлерге заңсыз қысым көрсеткені үшін қылмыстық жауапкершілікке тартылған.

Жол құрылысы сапасын қамтамасыз ету және осы салада жемқорлыққа жол бермеу мақсатында «Ұлттық жол активтері сапасы орталығы» республикалық мемлекеттік кәсіпорнымен бірлесіп «САПАЛЫ ЖОЛ» жобасы жүзеге асырылуда.

Қалалық сыбайлас жемқорлыққа қарсы департаменттің міндеті қоғаммен бірлесіп жол құрылысына тұрақты мониторинг жүргізу, кемшіліктер анықталған жағдайда тиісті актілер жасау және оларды өнім берушіге жіберу.

Осы жоба іске асырылған сәттен бастап (2019 жылғы маусым) 72 бұзушылық анықталды, оның 68-і мердігерлік ұйымдармен жойылды.

Анықтама: «Қорғас-Алматы-Шымкент» автомобиль жолының, Бадам өзені арқылы өтетін Оңтүстік айналма автожолы, Қазығұрт ауданында, Самал-3 мөлтек ауданындағы Мұғалжар және Жәнібек хан көшелерінің құрылысы сапасына мониторинг жүргізілді.

Қазақстан Республикасының Сыбайлас жемқорлыққа қарсы іс-қимыл Агенттігімен «Еріктілер жылы» аясында «ADAL KÓMEK» ЖОБАСЫ іске қосылды.

Аталған жобаның мақсаты — азаматтардың құқықтық сауаттылығын арттыру, сонымен қатар өмірлік маңызды мәселелерді шешу үшін халықтың әлеуметтік әлсіз топтарына құқықтық көмек көрсету болып табылады.

Еріктілер ретінде Департамент қызметкерлері, тәжірибелі заңгерлер, қоғам белсенділері тұрғындарға өздерін қызықтыратын мәселелер бойынша тұрақты түрде тегін кеңес береді.

Айта кетейік, кеңестер Агенттіктің Шымкент қаласы бойынша департаменті ғимаратында (Қазыбек би көшесі,3) апта сайын сенбі күні сағат 11-00-ден 13-00-ге дейін берілетін болады.