Шөкеевтің тапсырмасынан кейін снарядтан аман қалған отбасы

Арыс қаласының Дермене ауылындағы Тупаловтар отбасы Түркістан облысының әкімі Өмірзақ Шөкеевтің тапсырмасынан кейін ғана өз үйлерінен көшуге бел буған. Шаңырақтағы 10 адамның барлығы Тараздағы туыстарының үйіне кетеді.

Аз уақыттың ішінде апатты жарылыстан атылған снарядтың бірі осы шаңыраққа түсіпті. Мұны естіген Тупаловтар жанұясының отағасы Бахыт Алланазарұлы Аллаға мың да бір шүкір айтып, уақытында Түркістан облысының әкімі Өмірзақ Шөкеевтің ескертуін құп алғанына қуанып отыр. Оқиға орнына шұғыл жетіп, сол жердегі жағдаймен танысқан Түркістан облыстық мәслихаттың депутаты Дулат Әбіш және «Айғақ» телеарнасының түсірілім тобы снаряд түскен үйдің иесімен кездесті.  Сұхбаттасу барысында баспана иесі Бахыттың бұл жағдайдан есеңгіреп қалғандығы байқалады. Тупаловтардың шаңырағы жермен жексен болып, қабырғалары толықтай сөгілген.  Шөкеевтің жедел тапсырмасы дәл уақытында орындалмағанда үйіндінің ортасында қалатындығын елестете де алмай отыр.

Сондықтан облыс әкіміне айтар алғысы шексіз!

Арыс қаласының Дермене ауылында 202 отбасы, 1559 жан басы бар екендігін айта кетейік. Барлығы да дер кезінде эвакуацияланып, төтенше жағдайдан аман қалды.

Жалпы, Арыс қаласындағы төтенше жағдайдан соң 19 үйдің өртенгендігі белгілі болды. Бұл туралы Үкімет басшысына ҚР ІІМ Е.Тұрғымбаев баяндады.

Бүгін Үкіметте шұғыл жиын өткізген ҚР Премьер-Министрі А. Мамин ҚР Президенті Қасым-Жомарт Тоқаевтың тапсырмасына сәйкес тұрғын үйлерге, әлеуметтік және инфрақұрылымдық нысандарға, қала тіршілігін қамтамасыз етуші нысандарға тигізілген залал бағаланатынын айтты.

Қажетті қаражат бөлініп, тиісті шешімдер қабылданады.

«Айғақ-Ақпарат»