Қазақстан Республикасының Тұңғыш Президенті – Елбасы Н.Ә. Назарбаевтың 2018 жылғы 5 қазандағы «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауында жастар мен отбасы институтын кешенді қолдау мемлекеттік саясаттың басымдығына айналуға тиіс деп атап өткен болатын. Ал, 2015 жылдан бері елімізде жүзеге асырылып келе жатқан «Еңбек» бағдарламасының мақсаты — халқы тығыз орналасқан оңтүстік өңірі тұрғындарын жұмыс күші жетіспейтін солтүстік аймақтарға қоныстандыру. Осының негізінде Түркістан облысы бойынша өткен жылы 288 отбасы қоныс аударса, жалпы бүгінге дейін 1 500-ге жуық жанұя теріскейге барып, тұрақтап қалды. Аталған бағдарлама аясында Солтүстік жеріне барып өз кәсібін өрге дөңгелетіп отырған жерлестерімізге Түркістан облысының әкімі Өмірзақ Шөкеевтің бастамасымен қолға алынған «Қамқорлық» жобасын Түркістан облыстық мәслихаттың депутаты, «Nur Otan» Партиясының мүшесі Дулат Әбіш жалғастыруды қолға алды.
2020 жылдың 7-10 ақпан күндеріне Солтүстік Қазақстан облысына жоспарланған сапар аясында түркістандық бір топ делегация әуелі Петропавл қаласынан 38 шақырым қашықтықта орналасқан Мамлют ауданына ат басын бұрды. 18 мың тұрғыны бар ауданда 24 мектеп бар, ал білім алатын оқушылар саны небәрі 2500 ғана. Ал, Түркістан облысы мен Шымкент қаласында бір мектептің өзінде 2500 бала оқып жатқан білім ұялары бар.
Сондай-ақ, сапар барысында «Серпін» жобасының негізінде М.Қозыбаев атындағы Солтүстік Қазақстан мемлекеттік университетінде білім алып жатқан шымкенттік және түркістандық жастармен жолығудың реті түсті. Айтып өтейік, аталмыш бағдарламаның мақсаты — жоба арқылы жұмыс күші тапшы өңірлерге халық саны көп облыстардан жастарды әкеліп, жергілікті оқу орындарында қажет мамандықтар бойынша білім беріп, сол жерде жұмысқа қалдыру арқылы кадр мәселесін шешу болып табылады.
Мәселен, Түркістан облысының Жетісай қаласынан келген Жазира Жорабаева өткен жылы М.Қозыбаев атындағы Солтүстік Қазақстан мемлекеттік университетін бітіріп, жергілікті орта мектептердің біріне мұғалім болып орналасқан. Ал, Дина Серікбайқызы 2 жыл бұрын Төлеби ауданының Ұйымшыл ауылынан Теріскейдегі Мамлют ауданына қоныс аударады. Қазақстан Республикасының Тұңғыш Президенті-Елбасының «Дипломмен ауылға» бағдарламасы бойынша келген Дина Серікбайқызы 400 балаға шақталған Пакровка атындағы жалпы орта мектебінде психолог мамандығы бойынша жұмыс жасауда. Сонымен қатар, биология пәнінің мұғалімі Фарида Итбанова да 2017 жылы Ордабасы ауданы Темірлан елдімекенінен отбасымен осында қоныс аударыпты. Оңтүстіктің жайма шуақ ауа-райына үйренген ол, алғаш көшіп келгенде күннің суықтығынан қиналғандығын айтады. Алайда, еңбектің ебін тапқан Фарида «мемлекет тарапынан жасалып жатқан көмек бізге талпыныс сыйлады», — дейді. Осылайша, теріскейге келіп бүгінде елдің ертеңі болатын жастарға сапалы білім саналы тәрбие беріп жүрген ұстаздар мемлекет тарапынан жасалып жатқан жағдайларды айтып өз алғыстарын білдірді. Алдағы уақытта жеке кәсібін бастауды жоспарлап отырған олар «келем дейтін азаматтарға құшағымыз ашық, қолдау көрсетеміз» деп отыр.