Ата Заңымыздың абыройы асқан мерейлі күнде Оңтүстік Қазақстан облыстық сотының ұйымдастыруымен салтанатты жиын өтті. Бұл күні сот саласында ұзақ жылдар үздік қызмет атқарып, еңбек демалысына шыққан ардагерлер марапатқа ие болып, жас судьялар жиналған көпшілік алдында ант қабылдады.
Конституция – елдіктің, ерліктің, өрліктің белгісі, татулық пен ынтымағымыздың беріктігі, тәуелсіздігіміздің айғағы. Құндылығы жоғары, мәртебесі биік Ата Заңымыздың қалыптасқан 20 жылдың ішінде облыстың сот саласында жемісті атқарылған жұмыстар мен тындырымды тірліктер көп. Халықтың сотқа деген сенімі күшейіп, үміті арта түсті. Ендігі мақсат, жүйелі жұмысты жандандыра түсу. Ата Заң аясында еңбек етіп, Конституцияның әр бөлімі мен тармағы өмірлік сеніміне айналған сот саласының қызметкерлері осы айтулы күнде марапатқа ие болды. Яғни Елбасының Жарлығымен және де Жоғарғы Сот төрағасының атынан Алғысқа бөленіп, Құрметті судьялардың кеудесіне мерекелік төсбелгілер тағылды. Бұл марапат әділдік іздеген азаматтарға туралығын айтып, шындықты көздеген, кешегі билердің ізін жалғаған бүгінгі судьялардың еткен еңбегінің жемісі.
Еңлік ЗАМАНХАН
