Шымкентте алғаш рет мүмкіндігі шектеулі жандарға арналған алғашқы бос жұмыс орындарының жәрмеңкесі өтті. Қала әкімдігі мен «Жұмыспен қамту орталығы» бірлесе ұйымдастырған жәрмеңкенің мақсаты еңбек ұжымдарында жұмыс жасайтын мүмкіндігі шектеулі азаматтардың үлесін 3 пайызға жеткізу. Осы орайда аталмыш бастамаға қолдау білдірген ұжымдар саны аз болған жоқ. Яғни бұл күні жалпы саны 550-ге тарта мекеме бос жұмыс орындарын ұсынып, еңбек жәрмеңкесіне үлес қосты.
Бұған дейін облыс әкімінің қаулысы негізінде еңбек ұжымдарында жұмыс жасайтын мүмкіндігі шектеулі жандардың үлесі 3 пайыздан кем болмауы қажет делінген болатын. Аталмыш бастама Шымкент қаласында да қолдау тауып келеді. Бұл ретте қалалық «Жұмыспен қамту орталығымен» өткен жылдың өзінде шахардағы еңбек ұжымдарына 100 шақты мүмкіндігі шектеулі жан жұмысқа орналасқан. Ал биылғы жылы мекеменің алдында тағы 700 азаматты жұмысқа орналастыру жоспары тұр. Осылай деген «Шымкент қалалық жұмыспен қамту орталығының» директоры Асылжан Жамалбеков тек бүгінгі жәрменкенің өзінен тағы 200 адамды жұмысқа тартуға мүмкіндік бар дейді.
Мүмкіндігі шектеулі жандарға арналған жәрмеңкенің бірінші рет өткізіліп отырғандығына қармастан екі қолға бір күрек табылса деген үмітпен келгендер саны аз болған жоқ. Солардың бірі 27 жастағы Айсұлтан Шынәлиев. 1 топтағы мүмкіндігі шектеулі жан жәрмеңке арқылы өзіне лайықты жұмыс іздей келіпті. Оның айтуынша мұндай шаралар мүгедек жандар үшін тиімді әрі ыңғайлы болмақ.
Бұл күнгі жәрмеңкеге ұсынылған бос жұмыс орындары арасында әр түрлі саладағы қызметтер бар. Мәселен тігінші, шаштараз, оператор, программист, заңгер, бақылаушы, тіпті білім саласына қажетті мамандықтар да ұсынылған. Мүмкіндіктері шектеулі азаматтардың әлеуметтік тұрмыстық ахуалдарын жақсартумен қатар, оларға көбірек көңіл бөлу керек. Сондықтан да олар үшін «Жұмыспен қамту орталығы» шағын несие беріп, кәсіптерін ашуға да ықпал ету мүмкіндігі бар.
Абай Омар
