Ақтөбедегі теракт кезінде қаза болған 66/55 әскери бөлімінің жауынгері, жерлесіміз Сапар Досболды бүгін Оңтүстік жұртшылығы қимастықпен ақтық сапарға шығарып салды. Өзіне жүктелген әскери міндетті атқару кезінде ерлікпен қаза тапқан жас жауынгермен қоштасуға бұл күні облыс әкімі Бейбіт Атамқұлов, облыстық мәслихат хатшысы Қамытбек Айтөреевтер де арнайы келіп марқұмның отбасы мен туған туыстарына көңіл айтты. Ал Ұлттық ұлан сарбазын соңғы сапарға шығарып салу үшін ҚР Ұлттық Ұлан Бас қолбасшысының орынбасары Мұхаметқали Сатов бастаған бір топ әскери қызметкерлер де арнайы келген.
5 — маусымда 19 жастағы Шардара ауданына қарасты Көксу ауылының тұрғыны Сапар Еркінбекұлы Досбол Ақтөбе қаласында лаңкестермен болған атыс кезінде ерлікпен қаза тапты. Яғни 66/55 әскери бөлімінде Отан алдындағы борышын өтеп жүрген жерлесіміз өзіне жүктелген әскери міндетті адал, жоғары денгейде атқарып, жастығына қарамастан қайсарлық пен батылдық қасиеттерін таныта білді. Осы орайда марқұмды туған жерінде ақтық сапарға шығарып салуға жиналған көпшіліктің қарасы қалың. Облыс әкімі Бейбіт Атамқұлов пен облыстық мәслихат хатшысы Қамытбек Айтөреевтер де қалың жұртшылықпен бірге жауынгер тұрған Шардара ауданының Көксу ауылындағы шаңыраққа келіп, Досбол Еркінбекұлының отбасы мен туған туыстарына көңіл айтты. Бұл бүкіл Оңтүстік жұртына және күллі Қазақстан халқының жүрегіне түсіп отырған үлкен қайғы. Ол өзінің артына өшпес із қалдырды. Оның жарқын бейнесі біздің жадымызда әрдайым сақталады. Осылай деп өңір басшысы қаралы жиында тебірене сөйледі.
Ұлттық Ұлан сарбазымен қоштасуға ҚР Ұлттық Ұлан Бас қолбасшысының орынбасары Мұхаметқали Сатов бастаған ОҚО қорғаныс істері жөніндегі департаментінің қызметкерлері мен Шымкент әскери комисариатының өкілдері де қатысты. Олар да Отан алдындағы борышын абыроймен атқарған сарбаздың қазасы орны толмас қайғы екендігін айтып, жас жауынгердің туған туыстарына көңіл айтты.
Сапар Досбол Еркінбекұлы әскер қатарына 2015 жылдың 12 желтоқсанында Шардара аудандық қорғаныс істер бөлімшесі арқылы шақырылған. Осылайша Ақтөбе қаласындағы 66/55 әскери бөлімінде борышын өтеп жүрген ол отбасындағы 2 ұл, бір қыздың тұңғышы болатын. Бірақ амал нешік? Бар болғаны 19 жасында ерлікпен қаза тапқан жауынгерді отбасы мен туған туыстары және де ерлікті бағалаған қалың жұртшылық қимастықпен ақтық сапарға шығарып салды.
1997 жылы 25 қазанда нақ осы Шардара ауданының Көксу ауылында дүниеге келіп, ауыл құмында замандастарымен тай құлындай тебісіп өскен Сапар Еркінбекұлы өмірден тым ерте озса да артына өшпестей із қалдырды. Осылай деген көпшілік батыр жауынгерді мәңгілікке жер қойнауына тапсырды. Достыққа адал, қатарластарының ортасында абыройлы болған Досполдың жарқын келбетін жан жолдастары да естен шығармайды. Осылайша әскери міндетін адал атқару кезінде қаза тапқан жауынгердің отбасына облыс әкімдігінің атынан 5 млн. тенге көлемінде қаржылай көмек берілетін болады. Сонымен қатар жас сарбазды мемлекеттік наградаға ұсыну жөнінде де ұсыныстар жолданбақ. Себебі ерлік ешқашан ұмытылмақ емес.
Абай Омар
