«Мерейлі отбасы» Ұлттық конкурсының екінші кезеңі де өз мәресіне жетті. Облыстық байқауда 30 жанұя бақ сынап, үздіктер анықталған сәт – жұрттың ерекше ықыласына бөленді. Өзара келісім мен рухани сыйластықты нығайту, бір шаңырақ астында берекелі өмір сүрудің маңыздылығын арттыруды көздейтін шараның мақсаты жанұя құндылығын кеңінен насихаттау. Тартысты кезеңнің талқысынан сүрінбей өткен кентаулық Ошақбаевтар отбасы Оңтүстіктің намысын енді Республикалық жарыста қорғайтын болды.
Үшінші жыл жалғасын тауып, отбасы мерейін асырып отырған Ұлттық Конкурс Мемлекет Басшысы Нұрсұлтан Назарбаевтың идеясымен бастау алғаны белгілі. Мәңгілік елдің ертеңі – бүгінгі жастар. Сондықтан «Мерейлі отбасы» арқылы қоғам қызығушылығын тудырып, өнегелі өмірдің жарқын бастауын көпшілікке ұғындыру, ізгілік пен ынтымақтың, бірлік пен берекенің, татулық пен тәлімі мол тәрбиенің негізін танытуды жолға қойып отыр.
Әділбековтер әулеті. Бәйдібек ауданының намысын қорғауға келген аталмыш жанұя ұл-қыздарының жан-жақтылығымен ерекшеленді. Отағасы Абзал Әділбеков – жазушы, журналист болса, ұлдары да әке жолын жалғаған қаламгер, айтыскер ақын, енді бірі суретші. Отбасы тәрбиесін қашан да жоғары қоятын жас та өнегелі жанұяның алар асуы әлі алда. Облыс әкімі Бейбіт Атамқұловтың алғыс хатына ие болған Әділбековтер отбасы бұл марапаттың өмір жолында әрі қарай серпін беретіндігіне сенімді.
Еліміз бойынша жүргізілетін бұл байқаудың болашақ жастарға берер тәлімі мол. Өйткені, ең бастысы отбасы, ошақ қасы тәрбиесінің негізін қалап қана қоймай, үлгілі жанұялардың жарасымдылығын елге әйгілеу. Сол арқылы жауапкершіліктің, ана-ана парызының ұғымын кеңейту. Расымен де, бар тәрбиені, мектепке ысырып қоя салатындардың қатары аз емес. Қоғамның қызығушылығын отбасы назарына бұрса, әрбірінен алар өнеге мол.
Аудан-қаладан келген жанұялардың барлығы да бүгін марапат төрінен көрінді. Өйткені, жанұя атты кішігірім мемлекеттің тізгінін ұстап отырған ата-ананың ұрпағйы алдындағы міндеті орасан, өзгеге үлгі. Шымкент қаласының үздігі атанып, облыс басшысының Алғыс хатына ие болған Шаймерден Есенкелдиев пен отанасы Жанар Берікқызы 7 ұл-қызды тәрбиелеп отыр. Байқауға қатысушы ең жас көпбалалы отбасының бірі. Ұл-қыздары өнер, білім саласында республикалық және халықаралық конкурстардың жеңімпазы болып жүр.
Жүлделі үшінші орынды түлкібастық Күлбүбі Ешенқұлқызының отбасы алса, ұлттық қолөнерді дамытып жүрген сарыағаштық Сейдір Кульгиновтың жанұясы 2-орынды иемденді. Ал, ұлттық конкурстық облыстық тізгініндегі 1 орын кентаулық шаңырақ иелері Қаратай Ошақбайұлына бұйырды. Ақсақалдар алқасының белді мүшесі Кентау қаласының «Құрметті азаматы», 7 ұл тәрбиелеп, 25 немере, 21 шөбере сүйіп отыр. Ұлт Көшбасшысының ынтымақ пен бірліктің жалғауы болар әрбір бастамасын үлгі етіп отыратын өнегелі жанұя айналасына ізгілік нұрын сыйлап жүреді. Енді Қаратай ақсақалдың отбасы Оңтүстік беделін Республикалық сайыста қорғайтын болды.
Салтанат Тойболова
