Жазушы Мұхтар Әуезовтің шығармасына арқау болған Қызылкөпірде бүгін ұлан асыр той. Өйткені Арыстық ағайынның тілегін орындаған білім ұясы пайдалануға берілді. Бұған дейін Бәйдібек ауданына қарасты Екпіндідегі жалпы орта мектепте оқып келген Қызылкөпір ауылы балаларының енді өз мектебі бар.
Ұлт Көшбасшысы Нұрсұлтан Назарбаевтың «Қазақстанның үшінші жаңғыруы: Жаһандық бәсекеге қабілеттілік» атты Қазақастан халқына арнаған Жолдауында білім саласы жан-жақты қамтылған. Бес басымдықтан тұратын басты бағдарламалық құжаттың ең негізгі ерекшелігі – интеллектуалды ұлт қалыптастыру жолында ақпараттық технологияларға негізделген инновациялық дамыған қоғам құруды мақсат ету болып табылады. Сондай- ақ, ауыл мен қала арасындағы білім беру алшақтығын азайту мақсатында көптеген тірлік атқарылуда. Бұлай деуімізге себеп, бұған дейін мектебі болмаған Дермене ауылдық округінің Қызылкөпір ауылында 200 орындық білім ошағы пайдалануға беріліп, жергілікті жұртты үлкен қуанышқа бөледі.
Арыс қаласы бойынша 1 сынып табалдырығын 2650 бала аттап отыр. Ал, жаңадан қолданысқа берілген №3 мектепке жалпы саны 164 оқушы қабылданса, оның 19-ы 1–сыныпқа қадам басты. Түркістан облысы әкімінің тапсырмасы бойынша мектеп әкімшілігі ұжымда сыбайлас жемқорлықтың орын алмауын қатаң түрде қадағалауда. Осы мақсатта мұғалімдер автоматтандыру тестінен 3 күн арасында өтіп, штатқа қабылданады. Сонымен қатар мектептен 3 шақырым қашықтықтан алшақ тұратын оқушылар үшін арнайы тасымалдайтын шағын автобус балансқа берілді. Оны ауыл және кент әкімдері ұйымдастырады.
Заманауи техника білім ордасында үздік пайдаланылған. Мысалы, информатика кабинеті толығымен компьютерлермен жабдықталса, технология кабинетінде де қыздарға арналған тігін машинасы орнатылып, тәжірибе жүзінде үйренуге мол мүмкіншілік туғызуда.
Жаңартылған білім бағдарламасы аясында 3,6,8- сыныптар 100% оқулықтармен қамтамасыз етілген. Ал 1,2,5,7 сыныптардағы балаларға оқулық жетіспеушілік мәселесін шешу мақсатында электронды оқулық ұсынуда.
Айтып өтейік, бүгінгі мектептің ашылу рәсіміне Елбасының курстасы, КСРО Мемлекеттік сыйлығының лауреаты Аманәлі Әбдіраманов арнайы келіп қатысып, білім ұясы ұжымының қуанышына ортақтасты. Тәуелсіздік тағдыры туралы ой қозғап, мемлекетіміздің болашағы — жастар екендігін, олардың білімімен тау қопаруға болатындығын тереңінен ұғындырды.
Ал, Түркістан облыстық мәслихатының депутаты, облыстық қоғамдық кеңестің мүшесі Дулат Әбіш болса Қызылкөпір елдімекенінің тарихына тоқталып, ұлылардың шығармасына арқау болған тарихи кешеннің еліміз үшін маңызды екендігін ерекше атап берді. Орта ғасырларда Ұлы Жібек жолының бойында орын тепкен бұл мекеннің ішіне бүккен сыры бар. Тарих толқынында есімі алтын әріппен жазылатын теміржолшы Мұхамеджан Тынышпаевтың бұл жерге келуінің өзінде үлкен мән жатыр. Жазушы Мұхтар Әуезовтің шығармасына арқау болған Қызылкөпір, Елбасының «Болашаққа бағдар: рухани жаңғыру» бағдарламалық мақаласының «Туған жер» кіші бағдарламасындағы киелі орындардың қатарынан орын алынуы тиіс деп есептейді.
Жергілікті тұрғындар да жаңа білім ордасының ашылғанына қуанып, балаларын сапалы білім алуына жасалған жағдайға толыққанды өз ризашылығын білдіруде. «Баланың тұлға болып қалыптасуына мектеп қабырғасында жүріп алған білімі мен тәрбиесі маңызды орын алады» — дейді ата-ана қауымы.
