Солтүстік Қазақстан облысының Айыртау ауданы Имантау ауылында еңбекпен есейген қос қария тұрып жатыр. Жасы жетпістен асқан Бердібек Төлегенов Түркістан облысы, Сарыағаш ауданының тумасы. Туған жерінде шаруашылыққа бейімделіп өскен ол, бақытын еңбектен тапқан.
Сарыағаш ауданында найб имам болып жұмыс істеп, зейнетке шыққан. Кейін жеке кәсіпке ынта қойып, қажырлы қайсар мінезі Солтүстікке жетелеген.
Арқаның тың жерін игеріп, қазіргі таңда картоп өнімдерін өсіріп отыр. Еңбекпен шыңдалып өскен қария табиғаты таңғажайып Имантау ауылына осыдан үш жыл бұрын қоныс аударыпты. Алғашында жүрегінің сырқаттығына байланысты әсем табиғатқа қызығып, демалуға келіп тұрған. Кейіннен бұл өлкенің самал желі, таза ауасы сырқатына ем болыпты. Қазір картоп егіп, шабық шауып Аллаға шүкірлік айтып жүр.
Жұбайы Гүлсара Төлегенова үйрек пен қаз өсіру бизнесін ұршықша иіріп отыр. Алпыстан асқан ақ жаулықты жерлесіміздің де денсаулығы сыр берген. Бірақ Қызылжардың ауа-райы майдай жағып, арманы алға жетелепті. Қазір қос қария Имантау ауылына үлгілі отбасы болып, ынтымағымен ұйып отыр.
Бүгінгі күнннің қаһарманы болып отырған зейнеткерлердің мемлекетке алақан жаймай, өз бетінше шаруашылықпен айналысып отырғандары қызықтырды. Бақытқа тек еңбекпен жетуді көздеген қариялардың тірліктері бүгінгі жастарға үлгі. Қиындықтан қашпай, шаруашылыққа үлес қосып отыр. Елбасының көші-қон саясатын қолдаған қарияларға қарап, ақын Абайдың сөзі еріксіз еске түседі. «Ақырын жүріп анық бас, еңбегің кетпес далаға».