«Айғақ» телеарнасының түсірілім тобы «Ұлы Дала көші» жобасымен жолға шықты. Облыстық жұмыспен қамтуды үйлестіру және әлеуметтік бағдарламалар басқармасының мәліметіне сүйенсек, Солтүстік Қазақстан облысына 53 отбасы, Қостанайға 19 отбасы қоныс аударған екен.
Бағдарламаның басты мақсаты — ішкі көші-қонды насихаттау. Елбасы Нұрсұлтан Назарбаев «Қазақстанның Үшінші жаңғыруы: жаһандық бәсекеге қабілеттілік» Жолдауында еңбек нарығын жаңғырту мақсатында еңбеккерлерді артық жұмыс күші бар өңірлерден жұмыс күші жетіспейтін өңірлерге ұтымдылықпен тартуға қолдау көрсету керектігін атап көрсеткен болатын. Сондай-ақ, «Жұмыспен қамту – 2020» бағдарламасына арнайы тармақ енгiзiп, бұл мәселенi шешудiң оңтайлы жолдарын белгiледi. Халқы тығыз, жұмыссыздығы басым оңтүстiк тұрғындарын жұмыс күшi тапшы өңiрлерге қарай көшiрiп, экономикалық тұрғыдан қолайлы етiп орналастыру — қос бірдей бастаманың негізі. Сондықтан да оңтүстік өңірінен солтүстікке көшіп, өз кәсібімен айналысып, қызметін атқарып жатқан қоныс аударушыларға «Айғақ» телеарнасы жақында ғана атауы өзгерген облыс Түркістандықтардың ыстық сәлемін алып бара жатыр. Ондағы отбасылардың тыныс-тіршілігімен танысып, жұмыс орындарының маңызын аша түспекпіз.
Айта кетейік, Түркістан облыстық мәслихатының депутаты, Дүниежүзі қазақтарының қауымдастығының Түркістан облыстық филиалының төрағасы Дулат Әбіш жетекшілігімен «Айғақ» арнасының түсірілім тобында редактор Бағлан Байкөбекқызы, телеарнаның табалдырығын енді ғана аттаған жас журналист Тоғжан Нарбай бар. Сондай-ақ, Шымкент қаласының «Құрметті азаматы» жазушы, драматург Серік Жанәбіл де біздің түсірілім тобымен бірге мегаполистен 9 тамыз күні жолға шығып, алдымен әдеттегідей қасиетті Түркістан қаласына аялдады. Керуенге кеткендер Қызылорда, Қарағанды, Ақмола, Қостанай және Солтүстік Қазақстан облыстарын жүріп өтеді. Сапар сәтті болсын!
Бағлан Байкөбекқызы
