Түркістанда Б.Саттархановты еске алуға арналған Халықаралық турнир өтуде

Түркістанда Сидней Олимпиадасының чемпионы Бекзат Саттархановты еске алуға арналған бокстан жастар арасындағы ХV Халықаралық турнир жалауын көтерді. Б.Саттарханов атындағы спорт кешенінде өтіп жатқан дүбірлі додаға Ресей, Қытай, Израйл, Қазақстан, Түркіменстан, Өзбекстан, Қырғызстан, Тәжікстан сынды елдерден келген 154 боксшы бақтарын сынауда. Айта кетерлігі, турнирде бұрымды қыздар да бақ сынауда. Халықаралық турнирдің ашылу салтанатына Түркістан қаласы әкімінің орынбасары Ғ.Рысбеков, Сидней Олимпиадасының чемпионы Е.Ыбырайымов, Б.Саттарханов атындағы спорт мектебінің директоры Б.Қырықбаев, Бекзаттың әкесі С.Саттарханов пен анасы Сырлан апай қатысып, өздерінің жүрекжарды лебіздерін білдірді.
«Биыл он бесінші рет байрағы көтеріліп отырған бұл халықаралық турнир үлкен нәтижеге жетуде. Еліміз боксында қандайда бір толағай табыстар болып жатса, оған аталған турнирдің қосқан үлесі мол деп білемін. Осы турнирден түлеген спортшылар арасынан Бекзаттай дара ұлдар шығады деп есептеймін»,- деді Түркістан қаласы әкімінің орынбасары Ғ.Рысбеков. Сондай-ақ ол осы турнирдің беделін арттыруда Е.Ыбырайымов, О.Оразалинов, Б.Қырықбаев сынды спорт қайраткерлерінің арнайы келуі жастарға жалынды жігер беретіндігін жеткізді. Түркістан қаласы әкімінің атынан Бекзаттың ата-анасына сый құрмет те осы ретте көрсетілді.«Бұл дүбірлі дода еліміздегі жастар арасындағы ең ірі турнирлердің бірі болып отыр. Әлемдік додаларға жолдама беретін сайыс сынды бұл жарыста осы турнирден болашақ олимпиада чемпиондары шығады деп ойлаймын»,- деді ашылу салтанатында сөз алған Б.Саттарханов атындағы спорт мектебінің директоры Б.Қырықбаев. Ал, Олимпиада чемпионы Е.Ыбырайымов облыстың спорт саласындағы басшылығына алғысын білдіре келе, аталған турнирден даңқты боксшылар Б.Артаев пен Г.Головкин қанаттарын қатайтса, оған жуырда ғана Олимпиада лицензиясын алған А.Жүсіповтің де қосылғанын назардан тыс қалдырмады.Жиылған жұртқа өз лебіздерін білдірген Бекзаттың әкесі Сейілхан ақсақал жас жеткіншектерге Бекзаттың жолын тілесе, анасы Сырлан апа Бекзат халықтың ұлы болып қала беретінін айтты. Халықаралық дәрежедегі AIBA төрешісі Амангелді Макамалин бас қазы болып белгіленген Бекзат Саттархановты еске алуға арналған бокстан жастар арасындағы ХV халықаралық турнир Бекзаттың туған күні сәуірдің төртінде өз мәресіне жетпек.