Мемлекеттік орта білім беру ұйымдарының басшыларын конкурстық тағайындау – ҚР Білім туралы заңының негізінде бекітілген. Бұл ашықтық пен жариялылықты қамтамасыз етудің алғышарты. Осы арқылы конкурсқа қатысушылардың біліктілік талаптарына сәйкес, әңгімелесу жүргізіп жан-жақты талқыланады. Осылайша, Облыстық білім басқармасының 3 бірдей білім мекемесінің басшыларына жүргізілген іріктеу — мүмкіндіктерін айқындап берді. Қазығұрт ауданындағы Қаппаров атындағы мамандандырылған физика-математика мектебі, Кентау көпсалалы колледжі және Леңгір қаласындағы құлағы нашар еститін балаларға арналған мектеп-интернатының директорлығына өз кандидатурасын ұсынғандар комиссия мүшелерінің сауалдарына жауап берді. Комиссия төрағасы — облыстық білім басқармасы басшысының орынбасары Болат Жанәбіл болса, облыстық ата-аналар кеңесінің төрағасы Әнуарбек Бейсе бақылаушы ретінде қатысты. Кентау көпсалалы колледжінде 11 мамандық бойынша мамандар даярланады. 5 бірдей үміткер директорлық қызметті атқарғысы келетіндердің санатында. Алайда, ұйымдастырушылық қабілет, білімі мен біліктілігі басшының талабына сәйкес болуы керек. Сонда ғана, оқу процесін алға қарай жылжытып, колледж дәрежесін көтермек. Үміткерлер арасында ғылым доценті, кандидаттар және оқу ісі жөніндегі директор орынбасары қызметін атқарғандар бар. Алайда, қойылған сауалға мардымды жауап жоқ. Сондықтан, талапқа да сәйкес келмейді. Ал, әлеуметтік педагог қызметін атқарып келген Оразкүл Тегісбаева бұл қиындықтарды ойланбастан жеңіп шықты. Өйткені, бойында батылдық пен мақсаты бар адам қандай да жетістікке шыға алады дейді. Ал, Қазығұрттың Қаппаров атындағы мамандандырылған физика-математика мектебінің басшылық қызметіне 2 азамат ұсыныс білдіріпті. Бірі талай жылдық тәжірибесі бар математика пәнінің мұғалімі болса, енді бірі тарих пәнінен сабақ береді. Жас та болса, қамал аламын деген ойда. Тәжірибелі маманның бағы жанды бұл жолы. Жангибай Ахметов әрбір сұраққа мүдірмей жауап беріп, директорлық қызметке лайық деп танылды. Леңгір қаласындағы құлағы нашар еститін мектеп интернатына да конкурс жариялғаны қашан? Білім беру мекемесі басшысының қос бірдей орынбасарынан өзге кандидатурасын ешкім ұсынбаған көрінеді. Тәжірибесі басым, комиссия мүшелерінің сұрағына қанағаттанарлық жауап берген Аян Рысбаева 3 ай сынақ мерзімімен директор лауазымына тағайындалып отыр. Басқарма тарапынан алдағы уақытта бұл жұмыстар қатаң қадағаланатын болады.
Салтанат ТОЙБОЛОВА
