Кеше өңір басшысының төрағалығымен облыс әкімдігінің кезекті мәжілісі өтті. Онда облыстың 2015 жылғы әлеуметтік-экономикалық дамуының қорытындысы мен облыс бюджетінің игерілу жайы айтылды. Кезекті мәжілісте мінбеге алғаш болып облыстық экономика және бюджеттік жоспарлау басқармасының басшысы Арман Абдуллаев шықты. Өткен жылдың қортындысын баяндаған басқарма басшысы жергілікті бюджет түсімдерінің 9,3 пайызға артқанын, барлық аудан, қалаларда кірістер жоспардан асыра орындалғанын мәлімдеп өтті. Баяндаманы толықтай тыңдаған облыс әкімінің тек жалпылама статистиканы қамтыған есепке көңілі толмады. Өңірдің әлеуметтік –экономикалық дамуының қортындысына толықтай талдау жасай алмаған басқарма басшысына тиісті тапсырмалар да жүктеді. Кәсіпкерлік, туризм, инвестиция тарту облыс әкімінің назар аударған басты бағыттары деуге болады. Өңірде жұмыс істеп тұрған кәсіпкерлік субьектілерінің саны 184 мың бірліктен асқан. Жұмыспен қамтылғандардың саны 2,3 пайызға артыпты. Ал, өңірде негізгі инвестициялық салымдарды шағын кәсіпорындар жүзеге асырған, олардың үлесі бүгінде 61 пайыз. 2014-жылдың сәйкес кезеңімен салыстырғанда Сайрам, Сарыағаш, Төлеби, Түлкібас аудандары мен Арыс қаласында инвестиция көлемі айтарлықтай төмендепті. Ең төменгі көрсеткіште Сайрам ауданы 63 пайызбен көш бастап тұр. Оңтүстік ауылшаруашылыққа бейімделген аймақ. Салада жалпы өнім көлемі 2015 жылдың көрсеткіші бойынша 3,5 пайызға артқан. Оның ішінде мал шаруашылығы 158,7 млрд, егін шаруашылығы 184,8 млрд. теңгені құрап отыр. «Сыбаға» бағдарламасымен өткен жылы өңірде 22 мың 500 ірі қара сатып алынды. Ал тамшылатып суару әдісі бойынша жалпы көлем 44 мың гектарға жетсе, жылыжайлар аумағы қосымша 115 гектарға артты. Алайда жылыжай бойынша көрсеткіштерге Түлкібас ауданы еш атсалыспаған, ауданда жоспар мүлдем орындалмапты. Облыста атқарылған жұмыстар жетерлік, алайда кейбір салада ілгерушілік байқалмайды. Өңірдің экономикасы мен әлеуеттін арттыру үшін аудан-қалалар тиісті тапсырмаларды, жоспарларды толығымен орындауы тиіс. Мәжілісті қорытындылаған аймақ басшысы күн тәртібінің бірінші сұрағы бойынша Елбасымыз, Қазақстан Республикасы Президентінің «Қазақстан-2050» стратегиясы өңірімізде іске асыру бойынша нақты және егжей-тегжейлі жоспардың болуы керек екенін айтып, облыстық экономика және бюджеттік жоспарлау басқармасының басшысы Арман Абдуллаевқа барлық салалар бойынша жоғарыда аталған стратегиялық құжатқа сәйкестендірілген бағдарлама әзірлеуді тапсырды. Ал облыстық қаржы басқармасына 2016 жылға арналған бюджетті игеру бойынша арнайы жоспар дайындауды жүктеп, ол қаржының игерілмей қалу көлемдерін азайтуды көздейтін болуы қажеттігін айтты.
Жомарт БЕГІМБЕТОВ
