ҚР Тұңғыш Президент күні Шымкентте кең көлемде тойланды. Салтанатты мерекелік шара Түркістан сарайында өтті. Айтулы мерекеге облыс басшылығы, облыстық мәслихат депутаттары, әкімшілік органдар басшылары, облыстық басқарма басшылары, қала, ауданнан делегациялар, ардагерлер, облыстың зиялы қауым өкілдері, саяси партиялардың жетекшілері, үкіметтік емес және қоғамдық ұйымдар жетекшілері, діни конфессия басшылары, этно мәдени орталықтардың төрағалары мен өкілдері, білім, мәдениет, денсаулық, спорт саласы мекемелерінің қызметкерлері, жоғары оқу орындарының басшылары, жастар қоғамдық ұйымдарының төрағалары, студенттер, БАҚ өкілдері, т.б. қатысты.
Облыс әкімінің бірінші орынбасары Дархан Сатыбалды салтанатты шарада құтықтау сөз сөйлеп, жиналғандарға мерекелік лебізін білдірді. Қазақстанның тәуелсіздік алып, мемлекет ретінде қалыптасуынан бастап экономикасы дамудың даңғыл жолына түсуде Елбасының қажырлы еңбегі мен ұлы бастамалары негіз болып отыр. Бүгінде Тәуелсіздік, Қазақстан сынды ұғымдар Елбасының есімімен қатар айтылып, үндесіп жатыр. Қазақ елінің қазіргідей тұғырын биікке көтеріп, сан ұлттан құралған халқтың арасында бірлік пен татулықты сақтап, мәңгілік ел идеясымен алға жылжуында ұлт көшбасшысының ұшан-теңіз еңбегі жатыр.
Салтанатты шарада Ұлт мақтанышына айналған Мемлекет басшысының елімізде және әлемдік деңгейде жеткен жетістіктері дәріптелді. Сондай-ақ, бұл мерекеде облысымызда түрлі салада еңбек етіп, еліміздің дамуына айрықша үлес қосқан жандар да елеусіз қалмады. Яғни білім, денсаулық сақтау және экономика, ауыл шаруашылығы мен әлеуметтік саланың қызметкерлеріне облыс әкімдігінің «Алғыс хаты» табыс етілді. Құрмет-қошемет көрсетілген жандардың арасында 93 жастағы Ұлы отан соғысының ардагері Қаратай Төлебековте бар.
Ұлт көшбасшысы Нұрсұлтан Назарбаев әлем елдеріне өзінің бейбітшілік пен ынтымаққа, татулыққа үндейтін бастамаларымен, сондай-ақ, көреген реформатор ретінде танылған тұлға. Қазақсан президенті халықаралық қауымдастық алдында да еліміздің абыройы мен мәртебесін көтере білді. Сонымен бірге, өзінің жасампаз идеяларын жүзеге асыра білетін қайраткер ретінде де күллі әлемге танылып отыр.
Әлемде болып жатқан түрлі ұлтаралық жанжалдар мен қырғиқабақ соғыстардың зардабын саралай келе адамзат баласы үшін ең маңызды құндылық – бұл тыныштық пен бейбітшілік. Бұл ретте де Елбасының Қазақстанда сан ұлттардың тату-тәтті, өзара келісімде өмір сүруі үшін жасап жатқан жұмыстарынан бүгінде өзге елдер үлгі алуда. Ұлт көшбасшысы ешбір мемлекетте жоқ Қазақстан Халхы Ассамблеясын құрып, оған Конституциялық мәртебе берді. Өз кезегінде аталған құрылым бүгінде елдегі тұрақтылық пен татулықтың кепіліне айналып отыр. Сондай-ақ, Елбасы бүгінде жастарға да үлкен қолдау көрсетуде. Олардың жан-жақты, жоғары білім алып, еліміздің дамуы үшін қажетті инновациялық технологияларды енгізуге барлық жағдайды жасауда. Тек ендігі жерде жас буын артылған сенімді ақтаса болғаны.
Тұңғыш Президент күніне арналған мерекелік шарада өңіріміздің өнер майталмандары да кеш қонақтарының назарына әсем әуендерін тарту етті. Ал, Алматы облысының «Алатау» концерттік бірлестігі де арнайы келіп, оңтүстіктің сахнасында «Ұлы дала елі» атты сахналық композициясын тарту етті. Патриоттық рухты көтеретін халық музыкасы мен биі көрермендердің көңілінен шықты. Шараға келген халық қалаулылары мен ел зиялылары өз кезегінде Елбасының қайраткерлік тұлғасы жайлы және оның дәл мереке күні халыққа арнаған дәстүрлі жолдауы байланысты өз ойларын білдірді. ҚР Тұңғыш Президент күніне орай өткізілген мерекеге жиналғандар осылайша Елбасының ауыз толтырып айтатын көптеген жетістіктерін әңгімелеп жатты. Салтанатты шараның соңы концерттік бағдарламаға ұласып, өнерпаздар кеш қонақтарын әуелеген әнге бөлесе, бишілер де сахнада мың құбылып, әсерлі көріністерді тарту етті. Жалпы мерекелік іс-шараға 1400-ге жуық азаматтар қатысты. Іс-шара мерекелік отшашумен аяқталды.
