Бүгін алтыншы шақырылған Шымкент қалалық мәслихатының кезектен тыс он төртінші сессиясы өтіп, онда бекітілген күн тәртібіне сәйкес қалалық мәслихаттың 2017-2019 жылдарға арналған бюджеті туралы шешіміне өзгерістер енгізілу мәселесі қаралды. Сессияға қала әкімі Ғабидолла Әбдірахымов қатысты.
Мәжілісті қалалық мәслихат сессиясының төрағасы Ғ.Ташқараев жүргізіп отырды. 2016 жылғы кірістер бойынша артылған қаржы қаланың қандай қажеттілігіне жаратылатынын қала әкімінің орынбасары Г.Құрманбекова мәлімдеді. Түзетулердің нәтижесінде 2017 жылға арналған нақтыланған бюджет мына бағыттарға: қаладағы аудан әкімдіктері арқылы мәдени іс-шаралар өткізуге – 10,1 млн теңге, оқушыларды ыстық тамақпен қамтуға – 70 млн теңге, «ЭКСПО-2017» іс-шарасына қала мектептерінің оқушыларын қатыстыруға – 50 млн теңге, №5 спорт мектебінің ғимаратына күрделі жөндеу жұмыстарын бастауға – 18 млн теңге, 8 елдімекеннің егжей-тегжейлі жоспарлау жобасын (ПДП) әзірлеуге 199,8 млн теңге, қаңғыбас иттер мен мысықтарды аулауға және күтіп ұстауды ұйымдастыруға 15,6 млн теңге, жануарлардың энзоотиялық аурулары бойынша ветеринариялық іс-шараларға 15,3 млн теңге, көшелерді орташа жөндеуге 100 млн теңге, қалада ирригация жүйелерін жөндеуге 386,5 млн теңге, «Тассай» шағынауданындағы магистральды кәріз коллекторының құрылысына 45,4 млн теңге жұмсалатын болды.
Жиында сөз алған қала әкімі Ғабидолла Әбдірахымов ирригациялық жүйелердің тозығы жеткеніне, сондай-ақ қаланың кейбір аудандарындағы ескі үйлерді бұзу, салық төлеу сынды бірқатар маңызды мәселелерге тоқталды.
– Өткен аптада жауған жауын салдарынан қаладағы ирригациялық арықтар мен атыздар шамадан тыс толып кетті. Бұл жағдай жергілікті тұрғындарға үлкен қолайсыздық тудырды. Бұлай болуының себебі, ирригация жүйесі әбден ескіріп, нашарлап кеткен. Қаламызда көптеген жеке тұлғалардың меншігіндегі кафе, дүкен, тойханалардың алдында арық, аяқжол деген атымен жоқ. Әсіресе, Бәйдібек би көшесінде орналасқан тойханалардың алдында арық түгілі адам жүретін аяқжолды таппайсыз. Қаланың Бас жоспарына сәйкес, төрт ауданға ирригациялық жүйені жаңартуға бюджеттен 23 млн теңге қарастырып отырмыз, – деді Ғабидолла Рахматоллаұлы.
Шымкент қаласы әкімінің ресми сайты
