Кейде бір ғана жіп тұтас бір тарихты тарқатуы мүмкін. Ал сан түрлі жіптің өзара өрілуінен тұтас бір дәуірдің тынысын танытатын өнер туындайды. Шымкентте дәстүрлі қолөнер мен заманауи өнерді ұштастырған халықаралық гобелен көрмесі өтті. Кілем тоқу – қазақтың тұрмысымен біте қайнасқан байырғы өнер. Алайда жаһандық сауда мен жаппай өндірістің дамуы дәстүрлі қолөнердің өрісін тарылтты. Мамандар ендігі міндет – атадан қалған асыл мұраны сақтап қана қоймай, оны заманға сай жаңғырту дейді.
Көрмеде он суретшінің туындысы топтастырылған. Әрқайсысы жеке болмыс, ортақ жады мен әйелдер еңбегін өзіндік өрнекпен бейнелеген. Мұнда дәстүрлі қолөнер заманауи өнермен үндесіп, жаңа сипатқа ие болған.
Мұндағы әр туындының айтар астары бар. Әсіресе жеті жайнамаздан құралған композиция көпшіліктің назарын аударды. Оның жанында орналасқан фольгадан жасалған нысан да көрмеге өзгеше сипат беріп, келушілердің қызығушылығын оятты. Туындының мән-мағынасын автордың өзі тарқатып берді.
Өнердің өрісі кең, ал мұраның ғұмыры оны ұлықтаған ұрпақпен өлшенеді. Бұл көрме де көнеден жеткен қолөнердің бүгінгі заманмен үндесе алатынын көрсетті. Өйткені дәстүрді сақтау – өткенді қайталау емес, оның қадірін келер күнге жеткізу.