№2 АУРУХАНА ЖАҢА КОРПУСПЕН ТОЛЫҒАДЫ

Шымкенттегі №2 көпбейінді ауруханаға 80 орындық жаңа корпуспен толығады. Нысанның құрылыс алаңында арнайы капсула салу рәсімі өтті. Жаңа корпус іске қосылғанда, аурухананың мүмкіндігі кеңейіп, шұғыл әрі мамандандырылған медициналық көмек көрсету деңгейі артады.

Бүгінде қалалық №2 көпбейінді аурухана жылына шамамен 20 мың пациент қабылдайды. Енді медициналық мекеме 80 төсек-орынға арналған жаңа корпуспен толықтырылады. Мұнда нейрохирургия мен кардиореанимация бағыттарын дамытуға басымдық беріледі. Сондай-ақ инсульт, инфаркт және жіті коронарлық синдромға шалдыққан науқастарға көмек көрсету мүмкінді артады. Жаңа ғимаратта заманауи қабылдау-диагностикалық орталық орналасады. Корпус қолданыстағы аурухана және перзентхана ғимаратымен жабық галерея арқылы жалғанып, үш нысан біртұтас медициналық кластерге бірігеді. Ал жедел жәрдем көліктері үшін арнайы бастырма қарастырылады. Бұл пациенттерді қабылдау мен медицина мамандарының жұмысын тиімді ұйымдастыруға мүмкіндік береді.

Жаңа корпустың құрылысы Президент тапсырмасымен медициналық инфрақұрылымды дамыту мақсатында қолға алынды. Капсула салу рәсімінде құрылыс жұмыстарының жаңа кезеңіне жол ашылды. Жоба қала халқының өсіп келе жатқан қажеттілігіне сай медициналық көмектің көлемін арттыруға бағытталған. Нәтижесінде аурухананың төсек қоры ұлғайып, тұрғындарға қажетті мамандандырылған көмек алу мүмкіндігі кеңейеді.

80 орындық жаңа корпус аурухананың мүмкіндігін едәуір кеңейтпек. Мұнда заманауи диагностикамен қатар, күрделі жағдайдағы науқастарға шұғыл медициналық көмек көрсетуге басымдық беріледі. Осылайша үшінші мегаполистегі медициналық инфрақұрылым тұрғындардың сұранысына сай жаңа деңгейге көтеріледі.