АЗИЯ ЧЕМПИОНЫНА ҚҰРМЕТ

Азия төрінде ел қоржынына кезекті алтынды салған Софья Берульцева туған қаласына жеңіспен оралды. Шымкенттік саңлақты жанкүйерлері, спорт саласының өкілдері мен қала тұрғындары зор қошеметпен қарсы алды. 68 келі салмақта сынға түскен каратэші жарыста қарсыластарын айқын басымдықпен жеңіп, Азия ойындарының екі дүркін чемпионы атанды.

Қажымұқан атындағы орталық стадион алды  ерекше мерекелік көңіл-күйге бөленді. Мұнда Азия ойындарының қос алтын жүлдегері Софья Берульцеваны жақындары, жаттықтырушылары, спортшылар мен жанкүйерлері арнайы қарсы алды. Қолдарына көк ту ұстап, гүл шоқтарын ұсынған жұрт чемпионға ақжолтай тілектерін жеткізді. Ал қала әкімінің орынбасары спортшыны айтулы жеңісімен құттықтап, Шымкенттің абыройын асқақтатқан жетістігі үшін алғысын білдірді.

Софья Берульцева Жапонияның Айти–Нагоя қаласында өткен ХХ жазғы Азия ойындарында +68 келі салмақта сынға түсті. Ол шешуші кезеңге дейін Сауд Арабиясының өкілін  9:6, жартылай финалда Непал спортшысын 2:1 есебімен жеңді. Ал финалда Таиланд өкілін 8:0 есебімен айқын басымдықпен ұтып, алтын медальға қол жеткізді. Осылайша шымкенттік спортшы Азия ойындарында қатарынан екінші рет чемпион атанып, өзінің жеңісті жолын жалғастырды.

Бұған дейін чемпион Токио Олимпиадасының қола жүлдегеріде атанған.  Чемпионның ендігі мақсаты – ересектер арасында әлем чемпионы атану үшін бар күшін салып дайындалу.

Татами шеберін  жанкүйерлері арнайы құттықтап, ақ тілектерін жеткізді. Жеңімпазбен бірге естелік суретке түсуге асыққан жұрт чемпионға деген ыстық ықыласын білдірді. Азия төрінде көк туымызды көкке көтерген саңлақтың бұл жеңісі  қала спортының дамып келе жатқанын көрсетеді.