7 МЫҢ АНАҒА ҚЫЗМЕТ КӨРСЕТЕТІН ПЕРЗЕНТХАНА

Шымкентте ана мен балаға көрсетілетін медициналық көмектің әлеуетін арттыратын жаңа нысан бой көтеріп келеді. Ақжайық шағынауданындағы 200 төсек-орынға арналған перинаталдық орталықтың құрылысы бүгінде қарқынды жүруде. Жаңа орталықта акушерлік, гинекология, неонатология және неонаталдық хирургия қызметтері көрсетіледі. Қазір құрылыс жұмыстарының 30 пайызы аяқталған.   Жаңа перинаталдық орталық 200 төсек-орынға шақталған. Мұнда ана мен балаға медициналық көмектің толық циклін қамтамасыз ететін заманауи бөлімдер орналасады. Атап айтқанда, акушерлік, гинекология және неонатология бөлімдері жұмыс істеп, күрделі жағдайдағы нәрестелерге арналған неонаталдық хирургия қызметі көрсетіледі. Қазір құрылыс алаңында негізгі жұмыстар кезең-кезеңімен атқарылып келеді.

Медициналық орталықтың мүмкіндігі тек босандыру қызметімен шектелмейді. Мұнда диагностикалық зертхана, генетикалық зерттеулер жүргізуге арналған база, сондай-ақ консультациялық және оңалту бөлімшелері қарастырылған. Яғни болашақ орталық ана мен бала денсаулығына қатысты бірнеше бағыт бойынша қызмет көрсететін кешенді медициналық мекемеге айналмақ. Құрылыс алаңында бүгінде 250-ге жуық маман жұмыс істеуде.

Үшінші мегаполисте жыл сайын 30 мыңнан астам сәби дүниеге келеді. Сондықтан жаңа медициналық нысанның құрылысы қаладағы денсаулық сақтау жүйесі үшін маңызды жобалардың бірі. Орталық толық қуатында жұмыс істегенде жылына 7 мыңға дейін анаға қызмет көрсетуге мүмкіндік береді. Нысанды келер жылдың төртінші тоқсанында ел игілігіне беріледі.