Алматы көпсалалы клиникалық ауруханасында (АКҚА) профессор Жұмағали Исмаиловтың командасы үндістандық инвестормен бірлесіп, жоғары технологиялық медициналық көмек түрлерінің санын 2-ден 31-ге дейін арттырды. Бұл жөнінде Kazinform агенттігі хабарлады. 
Үндістан Республикасының Қазақстандағы Төтенше және Өкілетті Елшісі Й.К.Сайлас Тангал медицина ғылымдарының докторы, профессор Жұмағали Исмаиловқа ерекше еңбегі мен Қазақстандағы үнді диаспорасының дамуына қосқан елеулі үлесі үшін марапат тапсырды. Салтанатты рәсім Үндістан тәуелсіздігінің 80 жылдығына орай өтті.
Жұмағали Исмаило в 2009-2015 жылдары Оңтүстік Қазақстан, қазіргі Түркістан облысы ның денсаулық саласын басқарған болатын.
Соңғы алты жыл бойы үндістандық мамандар Қазақстанның медициналық білімі мен денсаулық сақтау саласын дамытуға атсалысып келеді. Осындай ынтымақтастықтың жарқын үлгісі — мемлекеттік-жекеменшік әріптестік (МЖӘ) аясындағы АККА дамуы. Жекеменшік серіктес — профессор Жұмағали Исмаиловтың басшылығындағы компания — аурухананы жаңғыртуды, заманауи технологияларды енгізуді, материалдық-техникалық базаны нығайтуды және кадрлық әлеуетті дамытуды өз мойнына алды.
Жоба нәтижелері АККА-дағы жоғары технологиялық медициналық көмек түрлерін 2-ден 31-ге дейін көбейтуге мүмкіндік берді. Бүгінде аурухана бұл көрсеткіш бойынша Қазақстандағы көшбасшылар қатарына кіреді.
Келесі кезең — МЖӘ шеңберінде жаңа заманауи медициналық кешен салу. Жекеменшік серіктестің инвестициясы шамамен 11 млрд теңгені құрайды. Қаражат құрылысқа, инфрақұрылымды дамытуға және нысанды заманауи медициналық құрал-жабдықтармен жарақтандыруға бағытталады.
— Біз үшін медицинаны дамыту — ең алдымен адамдардың денсаулығына, кәсіби кадрларға және заманауи технологияларға салынған инвестиция. Біз өңір тұрғындарының облыс аумағынан шықпай-ақ жоғары деңгейдегі медициналық көмек алуына ұмтыламыз, — деп атап өтті Жұмағали Исмаилов.
Үндістан — қолжетімді медицина, фармацевтика және медициналық туризм саласындағы әлемдік көшбасшылардың бірі. Медициналық технологиялардың жоғары деңгейімен қатар емдеудің тиімді бағасы бұл елді шетелдік пациенттер үшін сұранысқа ие бағытқа айналдырды.
Профессор Исмаиловқа берілген марапат денсаулық сақтау саласындағы қазақстандық-үндістандық ынтымақтастықты нығайтудың нышаны болды. Бұл әріптестік тек тәжірибе алмасумен шектелмей, нақты инвестициялар тартып, медициналық инфрақұрылымды дамытуда, заманауи технологияларды енгізуде және жоғары технологиялық көмек көрсету мүмкіндіктерін кеңейтуде өз көрінісін табуда. Бұл жұмыстың басты нәтижесі — Алматы өңірінің тұрғындары үшін сапалы медициналық көмектің қолжетімділігін арттыру.
