Білім күні — барша оқушы мен ата-ана үшін ерекше мереке. Шымкент қаласында орналасқан «Жас Дарын» бастауыш мектебі де биылғы оқу жылын салтанатты түрде бастады. Жанарында толқыныс пен үміт оты маздаған 136 бүлдіршін “Жас Дарын” мектебіне қабылданды.
Сынып жетекшісінің соңынан еріп, алғашқы қоңырау салтанатының төріне шыққан 1 сыныптың оқушылары үшін арнайы концерттік бағдарлама қойылып, ұстаздар, ата-аналар ақ тілегін арнады. Бұл күні баламен қатар, әрбір ата-ана да толқыныс үстінде. Баласын алғаш мектепке жетектеп әкелген ата-ананың, әженің қуанышы мен жауапкершілігі сезіліп тұр.
«Мектебім — мейірім мекені» тақырыбымен өткен салтанатты шараға ардагер ұстаздар арнайы шақырылды. Білгені мен түйгенін үйретуден еш жалықпайтын педагогика саласында табанды еңбек етіп, бейнетінің зейнетін көріп отырған ардагерлер жылы лебіз білдіріп, алдағы оқу жылына толағай табыстар тіледі.
Алғашқы қоңырау соғылды.
Бүлдіршіндер жаңа өмір белесін бастап, ұстаздар үлкен жауапкершілікке кірісті. Ал ата-аналар үшін бұл күн – баласының болашағына жасалған алғашқы қадам. Заманауи талаптарға сай жасақталған Жас Дарын мектебінде балаға қажетті бар жағдай қарастырылған. Әр сынып бөлмесі жаңа құрал-жабдықпен жабдықталып, түрлі үйірмелер ашылған. Өйткені бұл – тек білім ошағы ғана емес, дарынды балалардың шығармашылығын шыңдайтын орта. «Жас Дарын» мектебінде бастау алған білім – олардың келешегіне жол ашып, үлкен арманға жетелейтіні сөзсіз.
