Шымкент қаласының әкімі Мұрат Әйтенов қорытынды есепте үшінші мегаполистің алдағы уақытта 5 мақсатта дамитынын айтты. Олар: адами капиталды өсіру, инфрақұрылымды дамыту, кәсіпкерлікті қолдау, баспанамен қамту, Шымкент – халыққа қолайлы қала.
Адами капиталды өсіруде басымдық білім сапасын арттыруға бағытталады. Сондықтан Шымкентте алдағы 5 жылға жоспар жасалды. 2025 жылға дейін қалада 85 жаңа мектеп ашылады. Алдағы үш жылда үш ауысымды мектептер болмайды. Сондай-ақ заманауи «Оқушылар сарайын» салу көзделуде. Білім ошақтарының материалдық-техникалық базасын толықтыру да жоспарланған.
Адами капиталды өсіруде денсаулық сақтау саласының да маңызы зор. Әсіресе, ана мен бала денсаулығы басты назарда. 2020 жылы Шымкентте 31435 сәби дүниеге келген. Қалада 4 перзентхана болса, оның 2-і күрделі жөндеуден өтті. Алдағы уақытта тағы 1 перинаталдық орталықтың құрылысын бастау мақсат болып отыр. Сонымен қатар, 1000 орындық аурухана салынады.
Шымкент қаласындағы инфрақұрылымды дамыту бойынша 2023 жылға дейін қала халқы толығымен көгілдір отын және ауызсу жүйесімен қамтылады. Ал 2025 жылға дейін сапалы электрмен қамтамасыз етіледі. Алдағы уақытта электр желілері жер астымен жүргізілмек.