Шымкент қаласы бойынша 6 282 адамға қару-жарақ қолдануға заңды түрде рұқсат берілген. Қалалық Полиция Департаменті әкімішілік полиция басқармасы бастығының айтуынша, қаруы барлар – қатаң бақылауда. Ал ол үшін жылына үш рет арнайы жедел-профилактикалық іс-шарасы ұйымдастырылып отырады екен. Қаруды қолдану арқылы жасалатын қылмыстардың алдын алу мақсатында ағымдағы жылдың 3-інші ақпанынан бастап қару иелері тексерілуде. Нәтижесінде, қаруды сақтау және оны тіркеу заңдылықтарын бұзған 89 тұлға әкімшілік жауапкершілікке тартылды. Бұл туралы Шымкент қаласы Полиция Департаменті әкімішілік полиция басқармасының бастығы БАҚ өкілдеріне берген брифингте мәлімдеді.Салық кодексіне сәйкес қаруды пайдаланғаныңыз үшін мемлекеттік баж салығын төлеуіңіз шарт. Құжатыңыз мерзімінен өткен жағдайда айыппұл төлеуіңіз заң жүзінде қарастырылған. Сондай-ақ, тұрғылықты мекен-жайыңызды ауыстырған кезде қару иесі бұл туралы аумақтық ішкі істер органына 10 күн мерзімінде хабарлауы міндетті. Аталмыш ережені сақтамау Қазақстан Республикасы ӘҚБтК-нің 486-бабына сәйкес 43 755 теңге мөлшерінде айыппұл салуға әкеп соғады. Суық қаруды сақтау және қолдану ережелерін дұрыс сақталуын, меншік иесінің тұрғылықты мекен-жайын тіркеуін тексеретін әкімшілік полиция басқармасы 2 наурызға дейін қаруы бар тұрғындарды толығымен тексеріп шығуды көздейді.